‘టక్కర్‌’.. విడుదల ఖరారు

సిద్ధార్థ్‌, దివ్యాంశ కౌశిక్‌ జంటగా కార్తీక్‌ జి.క్రిష్‌ తెరకెక్కించిన చిత్రం ‘టక్కర్‌’. టీజీ విశ్వప్రసాద్‌ నిర్మాత. అభిమన్యు సింగ్‌, యోగిబాబు, మునీశ్‌ కాంత్‌ తదితరులు కీలక పాత్రలు పోషించారు. ఈ సినిమా జూన్‌ 9న తెలుగు, తమిళ భాషల్లో ఒకేసారి విడుదల కానుంది. ఈ విషయాన్ని చిత్ర బృందం శుక్రవారం ప్రకటించింది. ‘‘రొమాన్స్‌, యాక్షన్‌ మేళవింపుతో రూపొందిన చిత్రమిది. సిద్ధార్థ్‌ కెరీర్‌లో మరో గుర్తుండిపోయే చిత్రమవుతుంది. నిర్మాణాంతర పనులు ముగింపు దశలో ఉన్నాయి. ’’ అని చిత్ర వర్గాలు తెలిపాయి. ఈ సినిమాకి సంగీతం: నివాస్‌ కె.ప్రసన్న, ఛాయాగ్రహణం: వాంచినాథన్‌ మురుగేశన్‌.

సుధీర్‌.. ‘జి.ఒ.ఎ.టి’!

సుడిగాలి సుధీర్‌ హీరోగా ‘పాగల్‌’ ఫేమ్‌ నరేష్‌ కుప్పిలి దర్శకత్వంలో ఓ చిత్రం రూపొందుతోంది. చంద్రశేఖర్‌ రెడ్డి మొగుల్ల, బెక్కెం వేణుగోపాల్‌ సంయుక్తంగా నిర్మిస్తున్నారు. దివ్య భారతి కథానాయిక. ఈ సినిమాకి ‘జి.ఒ.ఎ.టి’ అనే టైటిల్‌ ఖరారు చేశారు. గ్రేటెస్ట్‌ ఆఫ్‌ ఆల్‌ టైమ్స్‌.. అన్నది ఉపశీర్షిక. సుధీర్‌ పుట్టినరోజు సందర్భంగా శుక్రవారం ఈ టైటిల్‌ను అధికారికంగా ప్రకటించారు. ఈ సందర్భంగా చిత్ర నిర్మాతలు మాట్లాడుతూ.. ‘‘మంచి కథతో తెరకెక్కుతున్న చిత్రమిది. శరవేగంగా చిత్రీకరణ సాగుతోంది. ఈ కథకు తగ్గట్లే లియో చక్కటి సంగీతమందిస్తున్నారు’’ అన్నారు. ఈ సినిమాకి కూర్పు: కె.విజయవర్ధన్‌, ఛాయాగ్రహణం: బాలాజీ సుబ్రహ్మణ్యం.

యాక్షన్‌ ‘మహావీరుడు’

‘మహావీరుడు’గా అలరించేందుకు సిద్ధమవుతున్నారు శివ కార్తికేయన్‌. ఆయన హీరోగా నటిస్తున్న ఈ చిత్రాన్ని మడోన్‌ అశ్విన్‌ తెరకెక్కిస్తున్న సంగతి తెలిసిందే. అరుణ్‌ విశ్వ నిర్మిస్తున్నారు. అదితి శంకర్‌ కథానాయిక. ఈ చిత్ర తెలుగు హక్కులను ఏషియన్‌ సినిమాస్‌ సంస్థ సొంతం చేసుకుంది. ఈ విషయాన్ని చిత్ర నిర్మాతలు శుక్రవారం అధికారికంగా ప్రకటించారు. ‘‘కొత్తదనం నిండిన మాస్‌ కథాంశంతో రూపొందుతోన్న చిత్రమిది. శివ కార్తికేయన్‌ మునుపెన్నడూ చూడని సరికొత్త పాత్ర పోషిస్తున్నారు. నిర్మాణాంతర పనులు శరవేగంగా జరుగుతున్నాయి’’ అని చిత్ర వర్గాలు తెలిపాయి. ఈ సినిమా జులై 14న థియేటర్లలోకి రానుంది. ఈ చిత్రానికి సంగీతం: భరత్‌ శంకర్‌, ఛాయాగ్రహణం: విధు అయ్యన్న.