R Narayana Murthy: ఉద్యోగ భారతం కోసం...

మన దేశం నిరుద్యోగ భారతం కాదు... ఉద్యోగ భారతం కావాలని చాటి చెప్పే ప్రయత్నమే మా చిత్రం అంటున్నారు ఆర్‌.నారాయణమూర్తి. ఆయన ప్రధాన పాత్రధారిగా నటిస్తూ... స్వీయ దర్శక నిర్మాణంలో తెరకెక్కించిన చిత్రం ‘యూనివర్సిటీ’. సెన్సార్‌ కార్యక్రమాలు పూర్తి చేసుకున్న ఈ సినిమాని జూన్‌ 9న ప్రేక్షకుల ముందుకు తీసుకొస్తున్నట్టు ఓ ప్రకటనలో తెలియజేశారు ఆర్‌.నారాయణమూర్తి. ఆయన మాట్లాడుతూ ‘‘పదో తరగతి మొదలుకొని గ్రూప్‌ 1, 2లాంటి ఉద్యోగ నియామకాల పరీక్షల్లోనూ పేపర్‌ లీకేజీలు జరిగితే విద్యార్థుల భవిష్యత్తు ఏం కావాలి? నిరుద్యోగుల జీవితాలు ఏమైపోవాలని ప్రశ్నిస్తూనే వినోదం పంచే చిత్రమిది. విద్యా వ్యవస్థ, ఉద్యోగ వ్యవస్థల నేపథ్యంలో చర్చించిన అంశాలు ఆసక్తిని కలిగిస్తాయి. ఆలోచనని రేకెత్తిస్తాయి’’ అన్నారు. ఈ చిత్రానికి పాటలు: గద్దర్‌ - నిస్సార్‌ - మోటపలుకులు రమేష్‌ - వేల్పుల నారాయణ, ఛాయాగ్రహణం: బాబూరావు దాస్‌, కూర్పు: మాలిక్‌.