‘జైలర్‌’ మరోసారి బరిలోకి..

ఆగస్టులో ‘జైలర్‌’తో సందడి చేయనున్నారు అగ్ర కథానాయకుడు రజనీకాంత్‌. నెల్సన్‌ దిలీప్‌ కుమార్‌ తెరకెక్కిస్తున్న చిత్రమిది. సన్‌ పిక్చర్స్‌ సంస్థ నిర్మిస్తోంది. మోహన్‌లాల్‌, శివ రాజ్‌కుమార్‌, తమన్నా, రమ్యకృష్ణ తదితరులు కీలక పాత్రలు పోషిస్తున్నారు. ఈ సినిమాలో రజనీ పాత్రకు సంబంధించిన చిత్రీకరణ ఇప్పటికే పూర్తయిన సంగతి తెలిసిందే. అయితే ఈ చిత్రం కోసం రజనీకాంత్‌ మరోసారి రంగంలోకి దిగినట్లు సమాచారం. నాలుగైదు రోజుల పాటు సాగే చిన్న షెడ్యూల్‌ ఇదని.. ఇందులో భాగంగా రజనీపై కొన్ని కీలక సన్నివేశాలు తెరకెక్కిస్తున్నట్లు తెలిసింది. ఈ షెడ్యూల్‌లో జాకీ ష్రాఫ్‌తో పాటు మరికొందరు ప్రధాన తారాగణం పాల్గొనన్నుట్లు తెలుస్తోంది. ఈ ప్రస్తుత షెడ్యూల్‌ ముగిసిన వెంటనే సినిమా పూర్తయినట్లు ప్రకటించనున్నారట. యాక్షన్‌ థ్రిల్లర్‌గా ముస్తాబవుతున్న ఈ సినిమాలో ముత్తువేల్‌ పాండియన్‌ అనే శక్తిమంతమైన పాత్రలో కనిపించనున్నారు రజనీ. ఈ చిత్రం నిర్మాణాంతర పనులు పూర్తి చేసుకొని ఆగస్టు 10న విడుదల కానుంది.