Bholaa Mania: భోళా హంగామా

‘‘అదిరే స్టైలయ్యా.. పగిలే స్వాగ్‌ అయ్యా... యుఫోరియా నా ఏరియా...’’ అంటూ సందడి  మొదలు పెట్టారు చిరంజీవి (Chiranjeevi). ఇదంతా ‘భోళా శంకర్‌’ (Bholaa Shankar) సినిమా కోసమే. చిరంజీవి కథానాయకుడిగా.. ఏకే ఎంటర్‌టైన్‌మెంట్స్‌ పతాకంపై తెరకెక్కుతున్న చిత్రమిది. తమన్నా కథానాయిక. కీర్తిసురేష్‌, సుశాంత్‌ ముఖ్య పాత్రలు పోషిస్తున్నారు. మెహర్‌ రమేష్‌ దర్శకత్వం వహిస్తున్నారు. రామబ్రహ్మం సుంకర నిర్మాత. ఆగస్టు 11న చిత్రం ప్రేక్షకుల ముందుకు రానుంది. సంగీత ప్రచార కార్యక్రమాల్లో భాగంగా ‘భోళా మేనియా... ’ పాటని ఆదివారం విడుదల చేశారు. మహతి స్వరసాగర్‌ స్వరపరిచిన ఈ పాటని రామజోగయ్యశాస్త్రి రచించగా, రేవంత్‌ ఎల్వీ ఆలపించారు. ‘‘భావోద్వేగాలు, యాక్షన్‌, హాస్యం సమపాళ్లల్లో మేళవించిన చిత్రమిది. తొలి పాట విడుదలతో భోళా మేనియా మొదలైంది. ఈ పాటలో చిరంజీవి డాన్సులతోపాటు, ఆయన స్టైలిష్‌ లుక్‌ ఆకట్టుకుంటుంద’’ని సినీవర్గాలు తెలిపాయి. రఘుబాబు, మురళీశర్మ, రవిశంకర్‌, వెన్నెల కిశోర్‌, తులసి, సురేఖావాణి, శ్రీముఖి, హైపర్‌ ఆది తదితరులు నటిస్తున్న ఈ చిత్రానికి ఛాయాగ్రహణం: డడ్లీ, ప్రొడక్షన్‌ డిజైన్‌:ఎ.ఎస్‌.ప్రకాశ్‌, కథా పర్యవేక్షణ: సత్యానంద్‌, సంభాషణలు: తిరుపతి మామిడాల.