Karthi: ‘96’ దర్శకుడితో..

‘సర్దార్‌’, ‘పొన్నియిన్‌ సెల్వన్‌’ సినిమాలతో వరుస విజయాలందుకొని జోరు మీదున్నారు కథానాయకుడు కార్తి (Karthi). ఇప్పుడీ ఆ జోష్‌లోనే ఆయన ‘జపాన్‌’గా సెట్స్‌పై ముస్తాబవుతున్న సంగతి తెలిసిందే. ప్రస్తుతం చెన్నైలో తుది దశ చిత్రీకరణలో ఉన్న ఈ సినిమా.. దీపావళి సందర్భంగా ప్రేక్షకుల ముందుకు రానుంది. కాగా, కార్తి ఇప్పుడు మరో ప్రాజెక్టుకి పచ్చజెండా ఊపినట్లు తెలిసింది. ‘96’ చిత్రంతో గుర్తింపు తెచ్చుకున్న ప్రేమ్‌ కుమార్‌ దర్శకత్వంలో ఓ సినిమా చేయనున్నారని సమాచారం. ‘కార్తి 27’గా పట్టాలెక్కనున్న ఈ చిత్రాన్ని 2డీ ఎంటర్‌టైన్‌మెంట్‌ సంస్థ నిర్మించనుంది. అంతేకాదు ఇందులో అరవింద్‌స్వామి ప్రతినాయకుడిగా కనిపించనున్నారట. కుటుంబ అనుబంధాల నేపథ్యంలో సాగే ఫ్యామిలీ ఎంటర్‌టైనర్‌గా ఈ చిత్రం ఉండనున్నట్లు తెలుస్తోంది. మరిన్ని వివరాలు త్వరలో వెల్లడి కానున్నాయి. ‘జపాన్‌’ పూర్తయిన వెంటనే కొత్త సినిమా పట్టాలెక్కనుంది.