అప్పుడే ఫలితాలు దక్కుతాయి!

‘‘పనిలో ఆనందాన్ని వెతుక్కున్నప్పుడు ఆ పని చాలా సంతృప్తిగా అనిపిస్తుంది. అలాగని దాన్నే వ్యక్తిగత జీవితంలోకి తెచ్చేసుకోకూడదు. వృత్తిని, వ్యక్తిగత జీవితాన్ని వేరు వేరుగా చూసినప్పుడే మానసిక ప్రశాంతత దొరుకుతుంది’’ అంటోంది నటి సాయిపల్లవి. ‘‘నేనే చిత్రం చేసినా సరే.. సాయంత్రం షూట్‌ ముగించుకోని బయటకొచ్చానంటే దాని గురించి మళ్లీ ఏమాత్రం ఆలోచించను. అదే తిరిగి సెట్స్‌లోకి అడుగుపెట్టానంటే మాత్రం నా నిజ జీవితాన్ని పూర్తిగా మర్చిపోతా. సెట్స్‌లో ఉన్నంతసేపూ ఆ సినిమాలోని పాత్రగానే జీవిస్తుంటా. ఏ విషయంలోనైనా ఆ సమయానికి తగ్గట్లుగా దేనికి ఇచ్చే ప్రాధాన్యత దానికి ఇవ్వగలిగినప్పుడే పనిపై పూర్తి ఏకాగ్రతను ప్రదర్శించగలుగుతాం. మనసును ప్రశాంతంగా ఉంచుకుంటూ అత్యుత్తమ ఫలితాలు అందుకోగలుగుతాం’’ అని చెప్పుకొచ్చింది సాయిపల్లవి. గతేడాది ‘విరాటపర్వం’, ‘గార్గి’ చిత్రాలతో ప్రేక్షకులతో పాటు విమర్శకుల ప్రశంసలు అందుకున్న ఆమె.. ఇప్పుడు తమిళంలో శివ కార్తికేయన్‌తో ఓ చిత్రంలో నటిస్తోంది.