గాంఢీవధారి రాకకు వేళాయే!

యువ కథానాయకుడు వరుణ్‌తేజ్‌ రెండు సినిమాలతో బిజీగా గడుపుతున్నారు. అందులో ఒకటి... ‘గాంఢీవధారి అర్జున’. ప్రవీణ్‌ సత్తారు దర్శకత్వం వహిస్తున్నారు. శ్రీ వెంకటేశ్వర సినీ చిత్ర పతాకంపై బి.వి.ఎస్‌.ఎన్‌.ప్రసాద్‌ నిర్మిస్తున్నారు. చివరి దశ చిత్రీకరణలో ఉన్న ఈ సినిమా విడుదల తేదీ ఖరారైంది. ఆగస్టు 25న చిత్రాన్ని ప్రేక్షకుల ముందుకు తీసుకొస్తున్నట్టు చిత్రబృందం బుధవారం ప్రకటించింది. ‘‘వరుణ్‌తేజ్‌ కెరీర్‌లోనే అత్యధిక వ్యయంతో రూపొందుతున్న చిత్రమిది. గాఢతతో కూడిన ఓ బలమైన పాత్రలో ఆయన కనిపిస్తారు. ప్రస్తుతం విదేశాల్లో చిత్రీకరణ జరుగుతోంది. ఈ సినిమాకి  యాక్షన్‌ ఘట్టాలు ప్రధాన ఆకర్షణగా నిలుస్తాయి. అత్యున్నత సాంకేతిక విలువలతో ప్రవీణ్‌ సత్తారు చిత్రాన్ని తెరకెక్కిస్తున్నార’’ని సినీ వర్గాలు తెలిపాయి. ఈ చిత్రానికి సంగీతం: మిక్కీ జె.మేయర్‌, ఛాయాగ్రహణం: ముఖేష్‌, కళ: అవినాష్‌ కొల్లా.