bhola shankar: జాం... జాం... జజ్జనక

‘భోళా శంకర్‌’గా సెట్స్‌పై తుది మెరుగులు దిద్దుకుంటున్నారు కథానాయకుడు చిరంజీవి. మెహర్‌ రమేష్‌ తెరకెక్కిస్తున్న ఈ చిత్రాన్ని రామబ్రహ్మం సుంకర నిర్మిస్తున్న సంగతి తెలిసిందే. తమన్నా కథానాయికగా నటిస్తుండగా.. కీర్తి సురేష్‌, చిరు చెల్లిగా కనిపించనుంది. ఈ సినిమా ఆగస్టు 11న విడుదల కానున్న నేపథ్యంలో చిత్రీకరణను పరుగులు పెట్టిస్తోంది చిత్ర బృందం. ఇందులో భాగంగా ప్రస్తుతం ఓ భారీ సెట్‌లో సంగీత్‌ సాంగ్‌ తెరకెక్కిస్తున్నట్లు చిరు లీక్‌ చేశారు. దీనికి సంబంధించిన ఓ చిన్న మేకింగ్‌ వీడియోను సామాజిక మాధ్యమాల ద్వారా అభిమానులతో పంచుకున్నారు. ‘‘జాం జాం జాం జజ్జనక.. తెల్లార్లు ఆడుదాం తయ్యతక్కా’’ అంటూ హుషారుగా సాగుతున్న ఈ పాటకు శేఖర్‌ మాస్టర్‌ నృత్యరీతులు సమకూరుస్తున్నారు. ఈ పాట చిత్రీకరణలో చిరు, తమన్నా, కీర్తి సురేష్‌, సుశాంత్‌లతో పాటు మిగిలిన ప్రధాన తారాగణమంతా కనిపించనున్నారు. దీనికి సంబంధించిన మేకింగ్‌ వీడియో నెట్టింట వైరల్‌గా మారింది. ఈ సినిమాకి మహతి స్వర సాగర్‌ సంగీతమందిస్తున్నారు.