Vimanam: నాన్న గొప్పతనం చెప్పే చిత్రమిది

సముద్రఖని, అనసూయ ప్రధాన పాత్రల్లో శివ ప్రసాద్‌ యానాల తెరకెక్కించిన చిత్రం ‘విమానం’. జీ స్టూడియోస్‌తో కలిసి కిరణ్‌ కొర్రపాటి నిర్మించారు. ఈ సినిమా ఇటీవల ప్రేక్షకుల ముందుకొచ్చింది. ఈ నేపథ్యంలోనే హైదరాబాద్‌లో శనివారం విలేకర్ల సమావేశం ఏర్పాటు చేశారు. ఈ సందర్భంగా సముద్రఖని మాట్లాడుతూ.. ‘‘ఓ మంచి కథ చెప్తే ప్రేక్షకులు కచ్చితంగా దాన్ని భుజానికెత్తుకుంటారు. అది ‘విమానం’తో మరోసారి నిరూపించారు. మళ్లీ జులై 28న ‘బ్రో’తో థియేటర్లో కలుద్దాం’’ అన్నారు. ‘‘నిజంగానే నాన్న మన జీవితాల్లో ఓ గొప్ప హీరో. ఈ కథ విన్నప్పుడు నాకు ‘మాతృదేవోభవ’ గుర్తొచ్చింది. ఇంత మంచి సినిమాలో భాగమైనందుకు గర్వంగా అనిపించింది’’ అంది నటి అనసూయ. దర్శకుడు శివ ప్రసాద్‌ మాట్లాడుతూ.. ‘‘సినిమా చాలా బాగుందని అందరూ ఫోన్‌ చేస్తుంటే ఓ కిక్‌ వచ్చినట్లుంది. నాన్నే గొప్ప హీరో అని చెప్పే చిత్రమిది’’ అన్నారు. ఈ కార్యక్రమంలో ధనరాజ్‌, చరణ్‌ అర్జున్‌, ధ్రువన్‌ తదితరులు పాల్గొన్నారు.