The Vaccine War: తుది దశకు వ్యాక్సిన్‌ వార్‌

వివేక్‌ రంజన్‌ అగ్నిహోత్రి దర్శకత్వంలో వచ్చిన ‘ది కశ్మీర్‌ ఫైల్స్‌’ వివాదాల మధ్య విడుదలైనా, బాక్సాఫీసు వద్ద మంచి కలెక్షన్లతో విజయాన్ని సొంతం చేసుకుంది. ఇప్పుడు ఆ దర్శకుడు నిజమైన సంఘటనల ఆధారంగా తెరకెక్కిస్తున్న మరో చిత్రం ‘ది వ్యాక్సిన్‌ వార్‌’ ఇటీవల ఈ సినిమా చిత్రీకరణ చివరి దశలో ఉన్నట్లు వివేక్‌ ట్విటర్‌ ద్వారా తెలిపారు. నానా పటేకర్‌ ఈ సినిమాలో కీలక పాత్ర పోషిస్తున్నారు. వివేక్‌ రంజన్‌ గతేడాదే ఈ సినిమా గురించి ప్రకటిస్తూ, ఈ సినిమా పట్ల తన ఆసక్తిని కనబరిచారు. ‘నీకు తెలియని దానితో యుద్ధం చేసి నువ్వు గెలిచావు’ అనే ట్యాగ్‌లైన్‌తో సినిమా మొదటి లుక్‌ని విడుదల చేసి సినిమా పట్ల అంచనాలను పెంచింది చిత్రబృందం. ఈ సినిమా గురించి ఎక్కువ సమాచారం వెల్లడించనప్పటికి సినిమా టైటిల్‌తో, మొదటి పోస్టర్‌లో ఉన్న ట్యాగ్‌లైన్‌తో ఇదొక సైన్స్‌ ఫిక్షన్‌తో కూడిన సినిమా అనుకొవచ్చు. కరోనా సమయంలో వైద్యులు, పరిశోధకులు చేసిన గొప్ప సేవలకు ఈ సినిమా నివాళులర్పించనుంది. హిందీ, ఇంగ్లిష్‌, బెంగాలీ, పంజాబీ, కన్నడ, తమిళ, తెలుగు, మలయాళం, గుజరాతీ, మరాఠీ భాషల్లో దసరాకు ప్రేక్షకుల ముందుకు రానుంది.