సంక్రాంతికి గ్రహాంతర విందు

ప్రముఖ కథానాయకుడు శివకార్తికేయన్‌, రకుల్‌ప్రీత్‌ సింగ్‌ జంటగా నటిస్తున్న చిత్రం ‘అయలాన్‌’... ‘డెస్టినేషన్‌ ఎర్త్‌’ అనేది ఉపశీర్షిక.  సైన్స్‌ ఫిక్షన్‌గా ప్రేక్షకుల ముందుకు రానున్న ఈ సినిమాను ఆర్‌.రవికుమార్‌ తెరకెక్కిస్తున్న సంగతి తెలిసిందే. విజువల్‌ ఎఫెక్ట్స్‌తో ఆలస్యంగా వసున్న ఈ సినిమా వచ్చే ఏడాది సంక్రాంతికి విడుదల కానున్నట్లు వార్తలొచ్చాయి. ఇప్పుడు అదే విషయాన్ని చిత్రబృందం సామాజిక మాధ్యమాల ద్వారా ఒక ఫొటోను అభిమానులతో పంచుకుంటూ అధికారికంగా ప్రకటించింది. ‘ఈ సంక్రాంతికి గ్రహాంతర విందు ఉండబోతోంది. సినిమా నాణ్యతను మెరుగుపరుస్తూ, ప్రేక్షకులకు మంచి అనుభూతిని కలిగించాలన్న లక్ష్యంతో మా ‘అయలాన్‌’ మీ ముందుకు రానుందని ఆశిస్తున్నాము. మీరు దీని కోసం చాలా కాలం వేచి ఉన్నారు. మేము అడగగలిగేది మరికొన్ని నెలలు మాత్రమే. మీ ప్రేమకు కృతజ్ఞతగా మేము ‘అయలాన్‌’ టీజర్‌ను అక్టోబరు మొదటివారంలో అందిస్తాము’ అంటూ వ్యాఖ్యల్ని జోడించింది. 24ఏఎం స్టూడియోస్‌ పతాకంపై నిర్మితమవుతోన్న ఈ చిత్రం తెలుగు, తమిళ, హిందీ, కన్నడ, మలయాళ భాషల్లో వచ్చే ఏడాది జనవరిలో విడుదల కానుంది.