‘V’ అసలు కథ అదేనా..?

హైదరాబాద్‌: టాలీవుడ్‌ నేచురల్‌ స్టార్‌ నాని, సుధీర్‌ బాబు కీలకపాత్రల్లో నటిస్తున్న చిత్రం ‘వి’. మోహన్‌ కృష్ణ ఇంద్రగంటి దర్శకత్వం వహిస్తున్న ఈ సినిమాకు దిల్‌ రాజు నిర్మాతగా వ్యవహరిస్తున్నారు. నివేదా థామస్‌, అదితిరావు హైదరీ కథానాయికలు. ఈ సినిమాలో సుధీర్‌ పోలీస్‌గా నటిస్తుండగా, నాని ప్రతినాయకుడి లక్షణాలు ఉన్న పాత్రలో కనిపించనున్నారు.

క్రైమ్‌ థ్రిల్లర్‌గా తెరకెక్కుతున్న ఈ సినిమా ఉగాది కానుకగా మార్చి 25న ప్రేక్షకుల ముందుకు రానుంది. ఈ నేపథ్యంలో ఇటీవల విడుదలైన ‘వి’ టీజర్‌ సైతం ప్రేక్షకులను ఎంతగానో ఆకట్టుకుంటుంది. ఇదిలా ఉండగా ఈ సినిమాకి సంబంధించి ఓ ఆసక్తికర విషయం టాలీవుడ్‌లో చక్కర్లు కొడుతోంది. తాజా సమాచారం ప్రకారం.. ఒకానొక సమయంలో యూఎస్‌లో జరిగిన సీరియల్‌ కిల్లింగ్స్‌ను ఆధారంగా చేసుకుని మోహన్‌ కృష్ణ ‘వి’ చిత్రాన్ని తెరకెక్కిస్తున్నారని, అంతేకాకుండా సదరు కిల్లర్‌ హత్య చేసిన ప్రతి చోటా తన ఇంటి పేరులోని మొదటి అక్షరాన్ని అక్కడ రాసేవాడని.. అలాగే ఈ సినిమాలో కూడా మర్డర్‌ చేసిన ప్రతిచోటా కిల్లర్‌ ‘వి’ అనే లెటర్‌ పెడతాడని.. అందుకే ఈ సినిమాకి ‘వి’ అనే టైటిల్‌ పెట్టారని రూమర్స్‌ వస్తున్నాయి.