యాక్షన్‌తో అదరగొట్టిన నాగశౌర్య

హైదరాబాద్‌: ఇప్పటివరకూ లవర్‌బాయ్‌, పక్కింటి కుర్రాడిగా ప్రేక్షకులను అలరించిన నాగశౌర్య ఇప్పుడు యాక్షన్‌ సన్నివేశాలతో అదరగొడుతున్నాడు. ఆయన కథానాయకుడిగా రమణ తేజ దర్శకత్వంలో తెరకెక్కిన చిత్రం ‘అశ్వథ్థామ’. మెహరీన్‌ కథానాయిక. అన్ని కార్యక్రమాలు పూర్తి చేసుకున్న ఈ చిత్రం జనవరి 31న ప్రేక్షకుల ముందుకు రానుంది. ఈ సందర్భంగా ఈ సినిమాకు సంబంధించి యాక్షన్‌ మేకింగ్‌ వీడియోను చిత్ర బృందం అభిమానులతో పంచుకుంది. ఇంతకుముందెన్నడూ చూడని రీతిలో నాగశౌర్య యాక్షన్‌ సన్నివేశాల్లో అదరగొట్టాడు. 

తాజాగా ఈ చిత్రం సెన్సార్‌ను కూడా పూర్తి చేసుకుంది. యూ/ఏ సర్టిఫికెట్‌ వచ్చింది. యాక్షన్‌ సన్నివేశాలు మరోస్థాయిలో ఉన్నాయని సెన్సార్‌ బోర్డు సభ్యులు ప్రశంసించినట్లు చిత్ర బృందం తెలిపింది. శ్రీచరణ్‌ పాకాల సంగీతం అందించిన ఈ సినిమాను ఐరా క్రియేషన్స్‌పతాకంపై ఉష మూల్పూరి నిర్మిస్తున్నారు.