వెంకటలక్ష్మి ఎలా మిస్సయిపోయింది?

ఆసక్తికరంగా ‘ఓ పిట్ట కథ’ టీజర్‌

హైదరాబాద్‌: విశ్వంత్‌, సంజయ్‌రావు, నిత్యాశెట్టి, బ్రహ్మాజీ ప్రధాన పాత్రల్లో తెరకెక్కుతున్న చిత్రం ‘ఓ పిట్టకథ’. చెందు ముద్దు దర్శకుడు. శుక్రవారం ఈ చిత్ర టీజర్‌ను అగ్ర కథానాయకుడు మహేశ్‌బాబు విడుదల చేశారు. ‘అనగనగా ఒక ఊళ్లో వెంకటలక్ష్మి అనే అందమైన అమ్మాయి ఉండేదట. అదే ఊళ్లో ఉంటున్న ప్రభుకి వెంకటలక్ష్మి అంటే చాలా ఇష్టమట. అప్పుడు వెంకటలక్ష్మి ఇంటికి క్రిష్‌ వచ్చాడట’ అంటూ ఓ చిన్నారి కథ చెబుతుండగా.. మధ్యలో వాళ్ల నాన్న ‘మరి వీరిద్దరిలో వెంకటలక్ష్మి ఎవరిని ఇష్టపడుతోంది’ అని అడగ్గా, ‘ఇంతలోనే ఆమె మిస్సయిపోయింది.. ఎలా కనిపించకుండా పోయిందో తెలియాలంటే ఓ పిట్ట కథ చూడాల్సిందే’ అంటూ ఓ చిన్నారి చిత్ర కథ టీజర్‌లో వివరించడం ఆసక్తికరంగా ఉంది.

గ్రామీణ వాతావరణంలో స్వచ్ఛమైన ప్రేమ కథకు, సస్పెన్స్‌ జోడించి సినిమాను తెరకెక్కించినట్లు టీజర్‌ బట్టి అర్థమవుతోంది. దాదాపు చిత్రీకరణ పూర్తి చేసుకున్న ‘ఓ పిట్ట కథ’ మార్చి 6న ప్రేక్షకుల ముందుకు రానుంది. భవ్య క్రియేషన్స్‌ పతాకంపై ఆనంద్‌ ప్రసాద్‌ ఈ సినిమాను నిర్మిస్తున్నారు. ప్రవీణ్‌ లక్కిరాజు స్వరాలు సమకూరుస్తున్నారు.