‘కేజీఎఫ్‌2’ కీలకపాత్రధారి వచ్చేసింది

సెట్‌లోకి అడుగుపెట్టిన బాలీవుడ్‌ నటి

బెంగళూరు: ‘కేజీఎఫ్‌ 2’ సినిమాలోని కీలక పాత్రధారి తాజాగా ఆ సినిమా సెట్‌లో అడుగుపెట్టారు. భారతీయ చలనచిత్ర ఖ్యాతిని మరోస్థాయికి తీసుకెళ్లిన చిత్రం ‘కేజీఎఫ్‌’. ప్రశాంత్‌ నీల్ దర్శకత్వంలో తెరకెక్కిన ఈ సినిమాతో కన్నడ నటుడు యశ్‌ ప్రపంచవ్యాప్తంగా ఎందరో అభిమానులను సొంతం చేసుకున్నారు. ప్రస్తుతం ‘కేజీఎఫ్‌’ చిత్రానికి సీక్వెల్‌గా ‘కేజీఎఫ్‌ ఛాప్టర్‌2’ తెరకెక్కుతున్న విషయం తెలిసిందే. ఈ సినిమాలో ఎంతో కీలకమైన ‘అధీర’ పాత్రలో బాలీవుడ్‌ నటుడు సంజయ్‌ దత్‌ కనిపించనున్నారు.

ప్రశాంత్‌ నీల్‌ దర్శకత్వంలోనే ‘కేజీఎఫ్‌2’ కూడా సిద్ధమవుతోంది. ఈ సినిమాలో ఇప్పుడు బాలీవుడ్‌ నటి రవీనా టాండన్‌ కీలక పాత్రను సొంతం చేసుకున్నారు. ఈ మేరకు ఆమె ఆదివారం ‘కేజీఎఫ్‌2’ సెట్‌లో అడుగుపెట్టారు. షూటింగ్‌ ఆరంభానికి ముందు దర్శకుడితో కలిసి ఆమె ఫొటోలకు ఫొజులిచ్చారు. దీనికి సంబంధించిన ఓ ఫొటోను చిత్ర నిర్మాణ సంస్థ సోషల్‌మీడియా వేదికగా అభిమానులతో పంచుకుంది. ‘డెత్‌ వారెంట్‌ను జారీ చేసిన లేడీ సెట్‌లోకి అడుగుపెట్టారు. ఎంతో సరదాగా ఉండే రవీనా టాండన్‌కు ‘కేజీఎఫ్‌2’ టీంలోకి సుస్వాగతం’ అని పేర్కొంది.