పోకిరీ కుర్రాళ్లను కొట్టిన నాగశౌర్య

ఆవేశంలో ఉన్న నటుడు.. ఆన్‌లైన్‌లో వీడియో

హైదరాబాద్‌: టాలీవుడ్‌ యువ కథానాయకుడు నాగశౌర్య కొందరు పోకిరీలను కొట్టిన వీడియో ప్రస్తుతం సోషల్‌మీడియాలో వైరల్‌గా మారింది. ఇంతకీ అసలు విషయం ఏమిటంటే.. నాగశౌర్య కథానాయకుడిగా నటించిన చిత్రం ‘అశ్వథ్థామ’. ప్రస్తుతం సమాజంలో మహిళలు ఎదుర్కొంటున్న వేధింపులను ప్రధానాంశంగా చేసుకుని తెరకెక్కిన ఈ చిత్రానికి నాగశౌర్యనే కథ అందించారు. రమణ తేజ దర్శకత్వం వహించిన ఈ సన్పెన్స్‌ థ్రిల్లర్‌లో నాగశౌర్యకు జంటగా మెహరీన్‌ నటించారు. ఇటీవల విడుదలైన ఈ చిత్రానికి ప్రేక్షకుల నుంచి మంచి స్పందన లభించింది. 

‘అశ్వథ్థామ’ చిత్రానికి విశేషమైన ప్రేక్షకాధరణ లభించిన నేపథ్యంలో తాజాగా ఈ సినిమా నుంచి ఓ ఫైట్‌ సీన్‌ను సోషల్‌ మీడియా వేదికగా చిత్రబృందం ఆదివారం విడుదల చేసింది. ఇందులో నాగశౌర్య.. తన చెల్లిని ఏడిపించిన ఒక కుర్రాడిని అతని స్నేహితులను కొడుతూ కనిపించారు. దాదాపు మూడున్నర నిమిషాలున్న ఈ సీన్‌ను సింగిల్‌ షాట్‌లో చిత్రీకరించారు.