సాధారణ వ్యక్తి సరిపోడు.. ఒక హీరో కావాలి!

 ఆసక్తికరంగా ‘శక్తి’ ట్రైలర్‌

హైదరాబాద్‌: ‘ఎంతో మంది నాతో సూపర్‌ హీరో అంటూ ఎవరూ లేరని చెప్పారు.. కానీ ఇప్పుడు చెబుతున్నా, స్వయంగా ఆలోచించగలిగే ప్రతి ఒక్కడు సూపర్‌ హీరోనే..’ అంటున్నారు తమిళ స్టార్‌ శివకార్తికేయన్‌. ఆయన నటిస్తున్న సినిమా ‘శక్తి’. కల్యాణి ప్రియదర్శన్‌, అర్జున్‌ కీలక పాత్రలు పోషించారు. పీఎస్‌ మిత్రన్‌ దర్శకుడు. యువన్‌ శంకర్‌ రాజా బాణీలు అందిస్తున్నారు. మార్చి 20 చిత్రం ప్రపంచ వ్యాప్తంగా ప్రేక్షకుల ముందుకు రాబోతోంది.

ఈ సినిమా తెలుగు ట్రైలర్‌ను సోమవారం విడుదల చేశారు. సూపర్‌ హీరో కావాలని కార్తికేయ చిన్నతనం నుంచి కల కంటుంటాడు. అర్జున్‌ ప్రస్తుత విద్యా విధానాన్ని ప్రస్తావిస్తూ కనిపించారు. ‘ఈ వ్యవస్థను మార్చడానికి సాధారణ వ్యక్తిలా ఉంటే సరిపోదు.. ఒక హీరో కావాలి..’ అని ఆయన భవిష్యత్తు గురించి మాట్లాడటం ఆసక్తికరంగా అనిపించింది. ఈ ట్రైలర్‌ ప్రస్తుతం యూట్యూబ్‌లో వీక్షకుల్ని మెప్పిస్తోంది. అంతేకాదు ట్విటర్‌ ట్రెండింగ్‌లో ఉంది.