ఈ పాత్ర చేయడానికి కాస్త భయపడ్డా!

‘‘గ్లామర్‌ పాత్రల కన్నా నటనా ప్రాధాన్యమున్న పాత్రలు చేసినప్పుడే నటిగా సంతృప్తి, ప్రేక్షకుల్లో గుర్తింపు దక్కుతుంది. అందుకే ఆ తరహా పాత్రలనే ఇష్టపడతా’’ అంటోంది కథానాయిక వర్ష . ‘96’, ‘బిగిల్‌’ వంటి తమిళ చిత్రాల్లో సహాయ నటిగా మెప్పించిన ఈ భామ ఇప్పుడు ‘చూసీ చూడంగానే’ చిత్రంతో తెలుగు తెరపైకి అడుగుపెడుతోంది. శివ కందుకూరి కథానాయకుడు. శేష సింధు రావ్‌ దర్శకత్వం వహించారు. శుక్రవారం విడుదల అవుతోంది. ఈ సందర్భంగా గురువారం హైదరాబాద్‌లో విలేకర్లతో ముచ్చటించింది వర్ష. 

ఇందులో మీ పాత్ర ఎలా ఉంటుంది?

వర్ష: ఇందులో నేను శ్రుతి అనే యువతి పాత్ర పోషిస్తున్నా. డ్రమ్మర్‌, మ్యూజిక్‌ డైరెక్టర్‌గా కనిపిస్తా. కథానాయకుడితో సరిసమానమైన ప్రాధాన్యమున్న పాత్ర. 

డ్రమ్మర్‌గా కనిపించేందుకు ఎలా సిద్ధమయ్యారు?

వర్ష: డ్రమ్మర్‌ పాత్ర గురించి చెప్పినప్పుడు కాస్త భయపడ్డా. ఎందుకంటే ఇప్పటి వరకే నేను చేసినవన్నీ సున్నితమైన పాత్రలు. ఈ తరహా పాత్ర చెయ్యగలనో లేదో అనుకున్నా. కానీ, నిర్మాతలు, దర్శకురాలు ఎంతో ప్రోత్సాహాన్నిచ్చారు. ఈ చిత్ర సెట్స్‌లోకి అడుగుపెట్టేముందు కాస్త శిక్షణ కూడా తీసుకున్నా.

‘చూసీ చూడంగానే’ కథ ఏంటి?

వర్ష: ఈ కథలో చాలా కోణాలున్నాయి. శేష సింధు మనసుకు హత్తుకునేలా తెరకెక్కించారు. ప్రతి ఒక్కరినీ ఈ సినిమా ఆకట్టుకుంటుంది.

హీరో శివ గురించి?

వర్ష: శివతో కలిసి పనిచేయడం సంతోషం అనిపించింది. అటు పెద్ద హీరోలతో.. ఇటు కొత్తవాళ్లతో చేస్తున్నప్పుడు ఆ అనుభవం భిన్నంగా అనిపిస్తుంది. 

సినిమాల్లోకి ఎలా వచ్చారు?

వర్ష: నాకు చిన్నప్పటి నుంచి నటనపై ఆసక్తి ఉండేది. మైక్రో బయాలజీ పూర్తయ్యాక ‘వెట్రివేల్‌’ అనే తమిళ చిత్రంతో వెండితెరపైకి వచ్చా. మలయాళంలోనూ మూడు చిత్రాలు చేశా. 

మీ తర్వాతి చిత్రాలు ఏంటి?

వర్ష: ప్రస్తుతం తెలుగులో ‘జాను’ చేశా. తమిళ ‘96’లో నేను పోషించిన పాత్రనే ఇందులోనూ చేశా. ఆనంద్‌ దేవరకొండతో ఓ సినిమా చేస్తున్నా. అందులో నేను గుంటూరు అమ్మాయిగా నటిస్తున్నా. ఆ పాత్రకి నేనే డబ్బింగ్‌ చెప్తున్నా.