జయలలిత జీవితంతో పోలికలున్నాయి

సీజన్‌-2 ఎ‌ప్పుడు ప్రారంభమవుతుందో తెలియదు

చెన్నై: నటి రమ్యకృష్ణ కీలకపాత్ర పోషించిన వెబ్‌ సిరీస్‌ ‘క్వీన్‌’. గౌతమ్‌ మేనన్‌ దర్శకత్వం వహించిన ఈ సిరీస్‌ సీజన్‌-1 గతేడాది ప్రేక్షకులను ఎంతగానో మెప్పించింది. ఇందులో రమ్యకృష్ణ తమిళనాడు దివంగత ముఖ్యమంత్రి జయలలిత హావభావాలతో కనిపించి అందర్నీ ఆకట్టుకున్నారు. తాజాగా ఆమె ‘క్వీన్‌’ గురించి ఓ ఇంటర్వ్యూలో మాట్లాడారు.

‘మేము తెరకెక్కించిన ‘క్వీన్‌’ చూసి జయలలిత జీవితాన్ని ఆధారంగా చేసుకుని రూపొందించామని చాలామంది అనుకుంటున్నట్లు దర్శకుడు తెలిపారు. నిజం చెప్పాలంటే అనిత శివకుమార్‌ రచించిన పుస్తకాన్ని ఆధారంగా చేసుకుని దీనిని రూపొందించాం. నాకు కూడా ఈ సిరీస్‌ బాగా నచ్చింది. ఎందుకంటే జయలలిత కథతో దీనికి పోలికలున్నాయి. ఆమె ధైర్యం, తెగింపు నాకెంతో ఇష్టం నిజంగానే ఆమె క్వీన్‌.’

‘గౌతమ్‌ నన్ను కలిసి ఈ కథ చెప్పగానే ఆసక్తి పెరిగింది. నేను పోషించిన శక్తిశేషాద్రి పాత్ర కోసం నన్ను నాలా ఉండమన్నారు. సంభాషణలను పవర్‌ఫుల్‌గా రాశారు. ముఖ్యంగా ఇంటర్వ్యూ సమయంలో రాసిన సంభాషణలు అద్భుతంగా అనిపించాయి.’

‘‘క్వీన్‌’ సీజన్‌-2 కోసం ఆతృతగా ఎదురుచూస్తున్నాను. త్వరగా షూటింగ్‌లో భాగం కావాలని ఉంది. ప్రస్తుతం ఉన్న పరిస్థితుల్లో షూటింగ్స్‌ ఎప్పుడు ప్రారంభమవుతాయో ఇంకా స్పష్టత రాలేదు. ఇటీవల నేను రేష్మా(రచయిత)తో మాట్లాడాను. సీజన్‌-2 స్ర్కిప్ట్‌ సిద్ధం చేసినట్లు ఆమె చెప్పింది. సీజన్‌-2 మరింత ఆసక్తికరంగా, ఉత్కంఠభరితంగా ఉంటుంది’ అని రమ్యకృష్ణ వివరించారు.