‘ఖైదీ’ హిందీలో ‘భోలా’

కార్తి నటించిన ‘ఖైదీ’ తమిళంతో పాటు తెలుగులోనూ విడుదలై మంచి విజయం సాధించిన సంగతి తెలిసిందే. ఈ సినిమాని హిందీలో రీమేక్‌ చేయడానికి అజయ్‌ దేవగణ్‌ ఎప్పటినుంచో సన్నాహాలు చేస్తున్నారు. కొవిడ్‌  పరిస్థితుల కారణంగా కుదర్లేదు. ఎట్టకేలకు ఈ సినిమా గురువారం లాంఛనంగా ప్రారంభమైంది. ఈ విషయాన్ని అజయ్‌దేవ్‌గణ్‌ ట్విటర్‌ ద్వారా తెలియజేశారు. ‘‘పరిస్థితులు అనుకూలించి ఉంటే ఈ చిత్రం గత ఏడాదే  సెట్స్‌పైకి వెళ్లి విడుదల కావాలి. మొత్తానికి ఈ గురువారం సెట్స్‌పైకి వెళ్లింది. ప్రకాష్‌ బాబు, రిలయన్స్‌ ఎంటర్‌టైన్‌మెంట్స్‌ సంస్థలు నిర్మిస్తున్నాయి’’అంటూ ట్వీట్‌ చేశారు. ధర్మేంద్ర శర్మ దర్శకత్వం వహిస్తున్న ఈ చిత్రానికి ‘భోలా’ అనే పేరుని ఖరారు చేశారు. కరోనా తీవ్రత ఎక్కువగా ఉన్న కారణంగా తక్కువమంది సిబ్బందితో చిత్రీకరణ చేస్తున్నారు.