Akshay Kumar: రంగుల పండక్కి బచ్చన్‌ పాండే

కరోనా మూడో వేవ్‌ కొనసాగుతున్న వేళ బాలీవుడ్‌లో ఈ నెల్లో సినిమాలన్నీ వాయిదా పడ్డాయి. వచ్చే నెల్లో రానున్న చిత్రాల రాక దాదాపు అనుమానమే. మార్చి నుంచి పరిస్థితులు కొంత మెరుగయ్యే అవకాశం ఉండటంతో మార్చి ద్వితీయార్ధం నుంచి విడుదల చేయడానికి కొన్ని సినిమాలు సిద్ధమవుతున్నట్లు తెలుస్తోంది. తాజాగా ప్రముఖ బాలీవుడ్‌ కథానాయకుడు అక్షయ్‌కుమార్‌ నటించిన ‘బచ్చన్‌ పాండే’ విడుదల తేదీని ప్రకటించారు. ఈ సినిమా ముందు అనుకున్న ప్రకారం అయితే మార్చి 4న రావాలి. మార్చి 18న హోలీ సందర్భంగా ప్రేక్షకుల ముందుకు తీసుకురానున్నట్లు కొత్త పోస్టర్‌తో ప్రకటించింది చిత్రబృందం. యాక్షన్‌ కామెడీ రొమాన్స్‌ డ్రామాగా తెరకెక్కిన ఈ చిత్రానికి ఫర్హాద్‌ శామ్‌జీ దర్శకత్వం వహిస్తున్నారు. సాజిద్‌ నడియాడ్‌వాలా నిర్మిస్తున్న ఈ చిత్రంలో కృతి సనన్‌ నాయికగా నటిస్తోంది.