పద్నాలుగేళ్ల లాల్‌సింగ్‌ ఛద్ధా

అదేంటి? సినిమా ఇంకా విడుదల కాకముందే ‘లాల్‌సింగ్‌ ఛద్ధా’కి పద్నాలుగేళ్లు ఏంటని ఆశ్చర్యపోతున్నారు కదూ!  ఔను.. ఈ చిత్ర ఆలోచన ఊపిరి పోసుకుంది పద్నాలుగేళ్ల కిందటే. జులై 4, 2008లోనే అబ్బాస్‌ టైర్‌వాలా తెరకెక్కించిన ‘జానే తూ.. యా జానే నా?’ విడుదలైంది. దీన్ని ఆమిర్‌ఖాన్‌ నిర్మించారు. ఆ సినిమా ప్రీమియర్‌ రోజున ఆమిర్‌, అతుల్‌కులకర్ణి పిచ్చాపాటీగా మాట్లాడుకున్నారు. ఈ చర్చల్లోంచి లాల్‌సింగ్‌ ఛద్ధా కథ రాసేలా అతుల్‌లో స్ఫూర్తి నింపారు ఆమిర్‌. తర్వాత హాలీవుడ్‌ సూపర్‌హిట్‌ చిత్రం ‘ఫారెస్ట్‌ గంప్‌’ ఆధారంగా ఈ కథ సిద్ధం చేశారు. కానీ హాలీవుడ్‌ చిత్ర హక్కుల కోసం ఆమిర్‌ఖాన్‌ ప్రొడక్షన్స్‌ ఎనిమిదేళ్లు నిరీక్షించాల్సి వచ్చింది. అద్వైత్‌ చవాన్‌ తెరకెక్కిస్తున్న ఈ చిత్రంలో కరీనాకపూర్‌ ఖాన్‌ కథానాయికగా నటిస్తోంది. నాగచైతన్య కీలక పాత్ర పోషించారు. ఆగస్టు 11న ఈ సినిమా ప్రపంచవ్యాప్తంగా ప్రేక్షకుల ముందుకొస్తోంది.