నిర్మాతగా చిత్రాంగదా

మోడల్, నటి చిత్రాంగదా సింగ్‌ నిర్మాతగా మారుతున్నారు. అత్యంత చిన్నవయసులో పరమ వీర చక్ర అవార్డు అందుకున్న యోగేంద్ర యాదవ్‌ జీవిత చరిత్ర ఆధారంగా ఓ చిత్రం తెరకెక్కించనున్నారు. దీనికి సంబంధించి హక్కులు చేజిక్కించుకున్నట్టు శనివారం ఆమె తెలిపారు. ‘నిజమైన హీరోలు, మరుగున పడ్డ గొప్ప వ్యక్తుల కథల్ని చెప్పడం ఎప్పుడైనా ఉత్సాహభరితంగా ఉంటుంది. వాళ్ల ప్రయాణాన్ని, జీవితాన్ని తెరకెక్కించే అవసరం ఉంది. ‘సూర్మా’ తర్వాత ఇది నా రెండో ప్రయత్నం’ అంటూ ఈ సందర్భంగా చెప్పుకొచ్చారు. కార్గిల్‌ యుద్ధంలో అసమాన పోరాటంతో శత్రు మూకల్ని మట్టి కరిపించిన వీరుడు సుబేదార్‌ యోగేంద్ర యాదవ్‌. పందొమ్మిదేళ్లకే ఆ ప్రతిష్ఠాత్మక పురస్కారం అందుకున్నారు. సీఎస్‌ ఫిల్మ్స్‌ దీపక్‌సింగ్‌తో సంయుక్తంగా ఈ బయోపిక్‌ నిర్మించనున్నారు చిత్రాంగదా.