మలి వయసులో సాహసయాత్ర

అమితాబ్‌ బచ్చన్‌, అనుపమ్‌ఖేర్‌, బొమన్‌ ఇరానీ కలిసి నటిస్తున్న చిత్రం ‘ఊంఛాయీ’. వయసు మళ్లిన ముగ్గురు స్నేహితులు చేసే సాహస యాత్ర ఆధారంగా తెరకెక్కుతోంది. పరిణీతి చోప్రా, నీనాగుప్తా కీలక పాత్రలు పోషిస్తున్నారు. సూరజ్‌ బర్జాత్యా దర్శకత్వం వహిస్తున్నారు. సోమవారం ఈ చిత్ర రెండో పోస్టర్‌ని సినీవర్గాలు విడుదల చేశాయి. అమితాబ్‌ బచ్చన్‌ ఈ పోస్టర్‌ని సామాజిక మాధ్యమాల్లో పంచుకున్నారు. మంచు పర్వత సానువుల్లో కూర్చొని మిత్ర త్రయం సేద తీరుతున్నట్టుగా అందులో కనిపిస్తోంది. ‘ఈ రెండో పోస్టర్‌ పంచుకుంటున్నందుకు సంతోషంగా ఉంది. నన్ను, నా స్నేహితులను ఆశీర్వదించండి’ అంటూ అమితాబ్‌ ట్వీట్‌ చేశారు. ఈ సినిమా నవంబరు 11న రానుంది.