కోలీవుడ్లో నూతన సంవత్సర సందడి

హీరోల ప్రత్యేక పోస్టర్ల విడుదల 

కేక్ కోసి సంబరాలు చేసిన చిత్ర బృందాలు 

కోడంబాక్కం: ఆంగ్ల సంవత్సరాది సందర్భంగా పలువురు సినీ ప్రముఖులు శుభాకాంక్షలు తెలియజేశారు. కొన్ని సినిమాలకు సంబంధించిన ప్రత్యేక పోస్టర్లను విడుదల చేశారు. కొందరు కేక్‌ కోసి సంబరాలు చేశారు. ఆ వివరాల్లోకి వెళితే.. నటుడు విక్రం ‘కోబ్రా’ చిత్రంలో నటిస్తున్న విషయం తెలిసిందే. అజయ్‌ జ్ఞానముత్తు దర్శకత్వం వహిస్తున్నారు. ఈ చిత్ర బృందం నూతన సంవత్సర వేడుకల్లో భాగంగా కేక్‌ కట్‌ చేయగా నటుడు విక్రం చిత్ర బృందానికి కేక్‌ తినిపించారు. అదేవిధంగా ‘మరిజువానా’ చిత్ర బృందం కూడా ప్రసాద్‌ ల్యాబ్‌లో జరిగిన ఓ కార్యక్రమంలో కేక్‌ కోసం నూతన సంవత్సర శుభాకాంక్షలు తెలియజేసింది. ఈ సందర్భంగా ఈ సినిమా దర్శకుడు ఎండీ ఆనంద్‌ మాట్లాడుతూ ‘‘మరిజువానా’ అంటే గంజాయి మొక్కకు శాస్త్రీయ నామం. గంజాయితో యవత ఎలా పెడదారి పెడుతోందన్నదే చిత్ర కథ. నగరంలో యువకుల జీవితాలను ఈ గంజాయి మార్చేస్తోంది. ఈ అంశంతో సినిమాను రూపొందించాం. ఇందులో పనిచేసినవారంతా యువకులే. ఇందులో ‘అట్టు’ ఫేమ్‌ రిషి రిత్విక్‌ హీరోగా నటిస్తున్నారని’ పేర్కొన్నారు. ఆశా కథానాయికగా నటిస్తోంది. రిషి రిత్విక్‌ పోలీసు అధికారిగా కనిపించనున్నారు. ఇటీవలే ఈ సినిమా సెన్సార్‌కు వెళ్లొచ్చింది. అయితే సినిమాలో దాదాపు 52 కట్‌లు చేస్తే ‘యూ/ఏ’ సర్టిఫికెట్‌ ఇస్తామని చెప్పారు. కానీ కథలో ఉన్న వాస్తవికత పోతుందనే కారణంతో ‘ఏ’ సర్టిఫికెట్‌తో చిత్ర బృందం బయటకు వచ్చింది.

విజయ్‌ ఫస్ట్‌లుక్‌..

ఖైదీతో గుర్తింపు తెచ్చుకున్న లోకేష్‌ కనకరాజ్‌ ప్రస్తుతం విజయ్‌ హీరోగా సినిమాను తెరకెక్కిస్తున్నారు. ఈ సినిమా టైటిల్‌, ఫస్ట్‌లుక్‌ను కొత్త సంవత్సరం కానుకగా మంగళవారం సాయంత్రం విడుదల చేశారు. ఈ సినిమాకు ‘మాస్టర్‌’ అని టైటిల్‌ పెట్టారు. ఇది విజయ్‌కి 64వ చిత్రం. ఏప్రిల్‌లో విడుదల చేయనున్నట్లు పోస్టర్‌లో ప్రస్తావించారు. ఇందులో విజయ్‌ కళాశాల ఆచార్యుడిగా నటిస్తున్నారు. అనిరుధ్‌ సంగీతం సమకూర్చుతున్నారు. ఇక సూర్య హీరోగా నటిస్తున్న ‘సూరరై పోట్రు’ సినిమా సెకెండ్‌ లుక్‌ను బుధవారం మధ్యాహ్నం విడుదల చేశారు. సుధా కొంగర ఈ చిత్రానికి దర్శకత్వం వహిస్తున్నారు. జీవీ ప్రకాశ్‌ సంగీతం సమకూర్చుతున్నారు. ఓ పక్షిపై సూర్య ముఖం ఉన్నట్లు ఫస్ట్‌లుక్‌ను రూపొందించారు. ఈ నెల 7వ తేదీన టీజర్‌ను విడుదల చేయనున్నట్లు ప్రకటించారు. మరోవైపు నటుడు సంతానం కూడా నూతన సంవత్సర శుభాకాంక్షలు తెలియజేస్తూ.. తన ‘డకాల్టి’ సినిమాకు సంబంధించిన పోస్టర్‌ను విడుదల చేశారు.

2020 విద్యార్థులతో...

వైవిధ్యానికి మారు పేరుగా ఉండే పార్తిబన్‌.. కొత్త సంవత్సర వేడుకల్లోనూ వైవిధ్యాన్ని కనబరిచారు. 2020 మంది విద్యార్థులతో కలిసి ఆయన నూతన సంవత్సర వేడుకలు చేసుకున్నారు. ఈ సందర్భంగా అందరితో కలిసి కేక్‌ కోసి బెలూన్లు ఎగురవేశారు. వారికి బహుమతులు అందజేసి కలిసి భోజనం చేసినట్లు పార్తిబన్‌ పేర్కొన్నారు. అదేవిధంగా బుల్లితెర నటీనటుల సంఘంలో సభ్యులకు ప్రత్యేక కానుకల అందజేత కార్యక్రమం జరిగింది. నటుడు మనోబాలా ముఖ్య అతిథిగా విచ్చేసి కొత్త దుస్తులు, మిఠాయిలు, బహుమతులు పంచి పెట్టారు. ఈ సందర్భంగా సంఘం అధ్యక్షుడు రవివర్మ మాట్లాడుతూ.. దాదాపు 16 సంవత్సరాలుగా నూతన సంవత్సరం రోజున సభ్యులకు కానుకలు అందజేస్తున్నామని పేర్కొన్నారు. వచ్చే ఏడాది సంఘంలోని 1800 మందికి కానుకలు ఇస్తామని ప్రకటించారు.

పారిశుద్ధ్య కార్మికులతో..

నటి గౌతమి ‘లైఫ్‌ అగైన్‌’ అనే ట్రస్టు ఆధ్వర్యంలో క్యాన్సర్‌ బాధితులకు తనవంతు సేవలు అందిస్తున్నారు. ఈ నేపథ్యంలో ఆంగ్ల సంవత్సరాది వేడుకలను పలువురు పారిశుద్ధ్య కార్మికులతో కలిసి జరుపుకొన్నారు. ఈ సందర్భంగా వారికి కొత్త దుస్తులు అందజేసి సంతోసంగా గడిపారు. ‘అందరికీ కష్టాలు ఉన్నాయి. ఆ కష్టాలన్నింటినీ మరిచిపోయి సంతోషంతో, ఆరోగ్యంతో జీవించాలి. నూతన సంవత్సర వేడుకలను పారిశుద్ధ్య కార్మికులతో కలిసి జరుపుకోవడం నాకు చాలా సంతోషంగా ఉంది. మీరు లేక మేము లేదు’ అని గౌతమి పేర్కొన్నారు.