రూ.150కోట్ల క్లబ్‌లో ‘దర్బార్‌’

చెన్నై: సాధారణంగా సూపర్‌స్టార్‌ రజనీకాంత్‌ సినిమా ఎప్పుడు విడుదలైనా థియేటర్ల వద్ద పండగ వాతావరణమే. అదే ఆయన సినిమా పండగ సందర్భంగా విడుదలైతే ఆ హంగామే వేరు. మురగదాస్‌ దర్శకత్వంలో సూపర్‌స్టార్‌ రజనీకాంత్‌ కథానాయకుడిగా తెరకెక్కిన చిత్రం దర్బార్‌. సంక్రాంతి కానుకగా జనవరి 9న విడుదలైన ఈ చిత్రం పాజిటివ్‌ టాక్‌ తెచ్చుకుంది. కలెక్షన్ల పరంగానూ రికార్డుల వేటలో దూసుకెళుతోంది. ఈ ఏడాది విడుదలైన మొదటి పాన్‌ ఇండియా మూవీ ఇదే. అయితే, మొదటి ఐదు రోజుల్లోనే రూ.150కోట్లు వసూళ్లు రాబట్టుకొంది. ఈ సందర్భంగా సినిమా నిర్మాణ సంస్థ తన అధికారిక ట్విటర్ ఖాతాలో ఓ పోస్టు పెట్టింది. ‘ఆట ఎవరైనా ఆడతారు.. కానీ సింహాసనం మాత్రం రాజుకే దక్కుతుంది.. ఇదిగో దర్బార్‌ వరల్డ్‌వైడ్‌ కలెక్షన్లు’ అంటూ రాసుకొచ్చింది. ఈ సినిమాలో హీరోయిన్‌గా నయనతార, ప్రతినాయకుడిగా సునీల్‌ శెట్టి, కీలక పాత్రలో నివేథ థామస్‌ కనిపించారు.