ఆ చిన్న ప్రమాదం అజిత్‌-షాలినీని కలిపింది!

అప్పుడే కలిశారు..

అజిత్‌, షాలినీ కలిసి నటించిన తొలి సినిమా ‘అమర్‌కాలం’. శరణ్‌ దర్శకుడు. 1999 ఆగస్టు 13న సినిమా ప్రేక్షకుల ముందుకు వచ్చింది. ఈ సినిమాలో అజిత్‌ కోపిష్ఠిగా కనిపించారు. థియేటర్‌లో ఉంటూ.. మద్యం సేవిస్తూ, గొడవలకు వెళ్తూ కాలం గడుపుతుంటారు. ఓ సినిమా రీల్‌ విషయంలో అతడికి, పోలీసు అధికారి కుమార్తె షాలినీకి మధ్య వివాదం ఏర్పడుతుంది. అలా మొదలైన వారి పరిచయంతో ఆపై ఇద్దరు ప్రేమలోపడతారు. ఈ కథాంశంతో రూపొందిన ‘అమర్‌కాలం’ సినిమాలోని యాక్షన్‌ సన్నివేశంలో షాలినీని అజిత్‌ కత్తితో బెదిరించాలి. కానీ షూట్‌లో అజిత్‌ ప్రమాదవశాత్తు ఆమె చేతికి నిజంగానే గాయం చేశారు. తనవల్ల షాలినీ గాయపడిందనే బాధతో ఆమె సెట్‌లో ఉన్నంత వరకు జాగ్రత్తగా చూసుకున్నారు. ఆ సమయంలో షాలినీకి అజిత్‌ వ్యక్తిత్వం ఏంటో తెలిసి, ఇష్టపడ్డారట. అలా ఇద్దరి మధ్య ప్రేమ చిగురించింది.

అజిత్‌ నుంచి ఫోన్‌..

షాలినీ అప్పటికే బాలనటిగా అనేక సినిమాల్లో నటించారు. కథానాయికగానూ పలు మలయాళ, తమిళ సినిమాలు చేశారు. కానీ ‘అమర్‌కాలం’ సినిమా ఆఫర్ వచ్చినప్పుడు ఆమె కాలేజీలో చదువుతున్నారు. పరీక్షల కారణంగా మొదట ఆఫర్‌ను తిరస్కరించారట. శరణ్‌ ఆమెను కలిసినప్పుడు షాలినీ నటించలేనని అన్నారు. కానీ ఆమెనే కథానాయికగా తీసుకోవాలని దర్శకుడు గట్టిగా అనుకున్నారు. దీంతో అజిత్‌ ఓరోజు షాలినీకి ఫోన్‌ చేసి, నిర్ణయం అడిగారు. పరీక్షలు ఉన్నాయని చెప్పడంతో.. అవి పూర్తయిన తర్వాతే షూటింగ్‌ చేద్దామని అజిత్‌ చెప్పారు. అలా షాలినీ పరీక్షలు పూర్తయిన తర్వాత సినిమా షూట్‌ను ఆరంభించారు. ఆ సమయంలో అజిత్‌ నటించిన ‘కాదల్‌ మన్నన్’ (1998) ప్రీమియర్‌ షోకు షాలినీ హాజరయ్యారు.

షాలినీకి కోపం వచ్చింది..

2010లో ఇచ్చిన ఇంటర్వ్యూలో షాలినీ ‘కాదల్‌ మన్నన్’ (1998) ప్రీమియర్‌ షోలో పాల్గొనడం గురించి ముచ్చటించారు. ఆ సమయంలో అజిత్‌ తన జుట్టుపై కామెంట్‌ చేశారని, కోపం తెప్పించారని చెప్పారు. ‘నా జుట్టును రింగురింగులుగా చేసుకుని షోకు వెళ్లా. అజిత్‌ నాకు షేక్‌హ్యాండ్‌ ఇస్తూ.. రింగుల జుట్టు మీకు నప్పలేదు అన్నాడు. నాకు చాలా కోపం వచ్చింది. వెంటనే నా ముఖం చూసి.. ‘తప్పుగా అర్థం చేసుకోకండి. ‘కాదలుక్కు మరియాధై’ (విజయ్‌తో కలిసి నటించిన సినిమా)లో మీరు జుట్టు స్వేచ్ఛగా చాలా బాగుంటుంది’ అన్నారు. అజిత్‌ అలా నిజాయితీగా మాట్లాడటం నాకెంతో నచ్చింది’ అని ఆమె అప్పట్లో అన్నారు.

నదికి సముద్రం దొరికింది..

‘అమర్‌కాలం’ సినిమా విడుదల తర్వాత అజిత్‌-షాలినీ లవ్‌ ప్రపోజ్‌ చేసుకున్నారు. 1999లో ఓ తమిళ మ్యాగజైన్‌కు ఇచ్చిన ఇంటర్వ్యూలో అజిత్‌ తనకు, షాలినీకి మధ్య ఉన్న బంధం గురించి ముచ్చటించారు. ‘నేను నదిలాంటివాడిని. నా జీవితం అనేక మలుపులు తిరిగింది. ఈ ప్రయాణంలో ఎన్నో రాళ్లను ఢీ కొట్టా. నేను ఎన్నో బాధ్యతల్ని నా భుజాలపై మోశా. ఇప్పుడు నాకు సముద్రం దొరికింది. ఈ సముద్రం నన్ను ప్రశాంతంగా ఉంచుతుందని ఆశిస్తున్నా. నా ఆత్మవిశ్వాసాన్ని పెంచుతుందని విశ్వసిస్తున్నా’ అని చెప్పారు.

ప్రేమ తర్వాత..

2000లో అజిత్‌-షాలినీ వివాహ బంధంతో ఒక్కటయ్యారు. పెళ్లి తర్వాత షాలినీ సినిమాలకు, నటనకు దూరంగా ఉండాలని నిర్ణయించుకున్నారు. ‘నాకు నటనంటే ఇష్టం. కానీ అజిత్‌ అంటే ఇంకా ఎక్కువ ఇష్టం. ఇటు నటిస్తూనే.. అటు ఇంటి బాధ్యతల్ని చూసుకునే వ్యక్తిని నేను కాదు. జీవితంలో మొదటి ప్రాధాన్యం దేనికనే విషయంలో నాకు చాలా స్పష్టత ఉంది’ అని 2009లో షాలినీ ఓ మ్యాగజైన్‌తో అన్నారు. ఇన్నేళ్లు గడుస్తున్నప్పటికీ అజిత్‌-షాలినీ ప్రేమలో ఎలాంటి మార్పులు చోటుచేసుకోలేదు.