నలుగురు యాంకర్లతో సుమ కొత్త గేమ్‌ షో

గెలిచిన వాళ్లకి బహుమతేంటో తెలుసా..

హైదరాబాద్‌: లాక్‌డౌన్‌ కారణంగా ఇంటికే పరిమితమైన ప్రముఖ యాంకర్‌ సుమ..  తాజాగా ఓ సరికొత్త గేమ్‌ షోతో ప్రేక్షకులను అలరించారు. ఫన్‌తోపాటు విరాళాల సేకరణ కోసం నిర్వహించిన ఈ గేమ్‌ షోలో.. సహచర యాంకర్స్‌ అనసూయ, రష్మి, రవి, ప్రదీప్‌ పాల్గొన్నారు. వీరంతా వారి వారి ఇళ్ల నుంచే ఈ గేమ్‌షోలో పాల్గొని ఆకట్టుకున్నారు. ‘సూపర్‌4 గేమ్‌ షో’ పేరుతో రూపొందించిన ఈ వీడియోలో లాక్‌డౌన్‌ వల్ల ఇంటికే పరిమితమైన వారందరూ ఏం చేస్తున్నారనే విషయాన్ని చాలా సరదాగా చూపించారు. మూడు రౌండ్స్‌తో కూడిన ఈ గేమ్‌ షోలో గెలుపొందిన వారిని చైనాలోని వుహాన్‌ ట్రిప్‌కు పంపిస్తానని సుమ సరదాగా చెప్పడం నవ్వులు పూయించింది.

‘లాక్‌డౌన్‌లో కూడా నా స్నేహితులు అనసూయ, రవి, ప్రదీప్‌, రష్మి అందించిన సపోర్ట్‌ వల్లే మిమ్మల్ని ఎంటర్‌టైన్‌ చేయడానికి ఈ వీడియో రూపొందించగలిగాను. ఫన్‌ను అందించడంతోపాటు విరాళాల సేకరణ కోసం మేము ఈ వీడియోను రూపొందించాం. ఈ వీడియో ద్వారా సమకూరే ఆదాయాన్ని మన తెలుగు టీవీ‌ పరిశ్రమకు చెందిన వారికి మా వంతు సాయంగా అందిస్తాం. అందరికీ ఈ వీడియో తప్పకుండా నచ్చుతుందని భావిస్తున్నాను. అందరూ ఇంట్లోనే ఉండండి, జాగ్రత్తగా ఉండండి’ అని సుమ పేర్కొన్నారు.