పేద డ్యాన్సర్లకు లారెన్స్‌ సాయం

చెన్నై: కరోనా వైరస్‌ నియంత్రణలో భాగంగా దేశవ్యాప్తంగా లాక్‌డౌన్‌ కొనసాగుతోంది. దీంతో పనుల్లేక ఎందరో పేద కళాకారులు కుటుంబ పోషణ విషయంలో ఇబ్బందులు ఎదుర్కొంటున్నారు. ఇలాంటి వారికి సాయం చేయడానికి పలువురు తారలు ఇప్పటికే ముందుకు వచ్చారు. తాజాగా నృత్య దర్శకుడు రాఘవ లారెన్స్‌ పేద డ్యాన్సర్లకు తన వంతు సాయం ప్రకటించారు. 23 మంది డ్యాన్సర్లకు ఆయన రూ.5.75 లక్షలను విరాళంగా అందించారు. ఆయా డ్యాన్సర్ల బ్యాంక్‌ ఖాతాల్లో రూ.25 వేల చొప్పున డిపాజిట్‌ చేశారు. ఆర్థిక ఇబ్బందుల్లో తమకు సాయం చేసిన లారెన్స్‌కు సదరు డ్యాన్సర్లు కృతజ్ఞతలు తెలిపారు.

హార్రర్‌ కామెడీ నేపథ్యంలో తెరకెక్కిన ‘కాంచన’ చిత్రానికి సీక్వెల్‌గా ఇటీవల విడుదలైన ‘కాంచన 3’ సినిమాలో లారెన్స్‌ నటించారు. ఈ సినిమా తర్వాత ఆయన ప్రస్తుతం బాలీవుడ్‌లో ‘లక్ష్మిబాంబ్‌’ చిత్రానికి దర్శకత్వం వహిస్తున్నారు. అక్షయ్‌ కుమార్‌ హీరోగా ఈసినిమా తెరకెక్కుతోంది. ‘కాంచన’ సినిమాకి హిందీ రీమేక్‌గా ‘లక్ష్మిబాంబ్‌’ రానుంది.

ఇదీ చదవండి

బిల్లా ఆర్టిస్ట్‌కు లారెన్స్‌ సాయం