వరుణ్‌తేజ్‌కు హ్యాండ్‌ ఇచ్చిన రానా, నితిన్‌

‘నాతోనే ఉంటానంటూ ఇలా చేశారు’

హైదరాబాద్‌: యువ కథానాయకుడు వరుణ్‌తేజ్‌ వివాహం త్వరలో జరగబోతోందని ఇటీవల వార్తలు చక్కర్లు కొట్టిన సంగతి తెలిసిందే. ఈ మేరకు యూట్యూబ్‌లో వచ్చిన వీడియోను స్క్రీన్‌షాట్‌ తీసిన కథానాయకుడు సాయిధరమ్‌ తేజ్‌ ట్విటర్‌లో పోస్ట్‌ చేశారు. ‘ఏంటి బావా(వరుణ్‌ను ఉద్దేశిస్తూ).. నీకు పెళ్లంట?’ అని ఆశ్చర్యపోతున్న ఎమోజీలను షేర్‌ చేశారు. దీనికి వరుణ్‌తేజ్‌ రిప్లై ఇచ్చారు. ‘దానికి (వివాహానికి) చాలా సమయం ఉందిలే కానీ.. మన రానా, నితిన్‌ మాత్రం ఎప్పటికీ నీతోనే ఉంటామంటూనే సింపుల్‌గా సింగిల్‌ గ్రూప్‌ నుంచి ఎగ్జిట్‌ అయిపోయారు’ అని పేర్కొన్నారు.

వరుణ్‌ ట్వీట్‌కు నటి మంచు లక్ష్మి స్పందిస్తూ.. ‘అది నిజమే..’ అంటూ మద్దతు తెలిపారు. దీనిపై రానా, నితిన్‌ ఇంకా కామెంట్‌ చేయలేదు. రానా ఈ ఏడాదిలో తన ప్రియురాలు మిహికా బజాన్‌ను వివాహం చేసుకోబోతున్నారు. ఇటీవల ‘రోకా’తో వీరిద్దరి పెళ్లి సందడి మొదలైంది. డిసెంబరులోపు  రానా వివాహం జరుగుతుందని ఆయన తండ్రి సురేశ్‌బాబు చెప్పారు. ఇటీవల నితిన్‌కు తన ప్రేయసి షాలినితో నిశ్చితార్థం జరిగింది. ఏప్రిల్‌లో దుబాయ్‌లో డెస్టినేషన్ వెడ్డింగ్ చేసుకోవాలనుకున్నారు. కానీ లాక్‌డౌన్‌ కారణంగా పెళ్లి వాయిదా పడింది. మరోపక్క కథానాయకుడు నిఖిల్‌ లాక్‌డౌన్ సమయంలోనే ఓ ఇంటివారయ్యారు. తన ప్రేయసి పల్లవి వర్మను మనువాడారు. లాక్‌డౌన్‌ నేపథ్యంలో తొలుత వివాహం వాయిదా వేసుకున్న నిఖిల్‌.. చివరికి  తక్కువ మంది అతిథుల సమక్షంలో ప్రభుత్వ నిబంధల్ని పాటించి, పెళ్లి చేసుకున్నారు.