పరిణీతి.. యంగ్‌ అఛీవర్‌

‘ఊంఛాయీ’తో మెప్పించిన కథానాయిక పరిణీతి చోప్రా ‘క్యాప్సూల్‌ గిల్‌’, ‘చమ్కీలా’ చిత్రీకరణలో బిజీగా ఉంది. తను ఆదివారం సామాజిక మాధ్యమాల ద్వారా ఓ కొత్త కబురు చెప్పింది. అయితే ఇది సినిమాలకు సంబంధించిన విషయం కాదు. ఆమె వ్యక్తిగత విజయం. భారత్‌కి స్వాతంత్య్రం వచ్చి 75 ఏళ్లు పూర్తైన సందర్భంగా బ్రిటీష్‌ కౌన్సిల్‌ ఇంగ్లండ్‌లో విద్యనభ్యసించి, వివిధ రంగాల్లో విజయం సాధించిన 75 మందిని యంగ్‌ అఛీవర్స్‌గా గుర్తించింది. కళలు, సంస్కృతి, వినోదం విభాగంలో పరిణీతిని ఎంపిక చేశారు. జనవరి 25నే ఈ పురస్కారం అందుకున్న పరిణీతి తాజాగా ఈ వివరాలను పంచుకుంటూ ‘జీవితం ఒక వృత్తంలాంటిది’ అని కామెంట్‌ జోడించింది. చదువుల్లో ముందుండే పరిణీతి చోప్రా 2009 సంవత్సరంలో యూనివర్సిటీ ఆఫ్‌ మాంచెస్టర్‌ నుంచి ఇంటర్నేషనల్‌ బిజినెస్‌, ఫైనాన్స్‌ అండ్‌ ఎకనామిక్స్‌ నుంచి పట్టా అందుకుంది.