Gentleman: ‘జెంటిల్‌మ్యాన్‌ 2’ దర్శకుడు ఖరారు.. ఎవరంటే?

ఇంటర్నెట్‌ డెస్క్‌: నటుడు అర్జున్‌, ప్రముఖ దర్శకుడు శంకర్‌ కలయికలో సుమారు 29 ఏళ్ల క్రితం వచ్చిన సూపర్‌ హిట్‌ చిత్రం ‘జెంటిల్‌మ్యాన్‌’. ఈ సినిమాని నిర్మించిన కె. టి. కుంజుమోన్‌ ‘జెంటిల్‌మ్యాన్‌ 2’ని (Gentleman 2) ఇటీవల ప్రకటించిన సంగతి తెలిసిందే. ఇప్పటికే సంగీత దర్శకుడు, నాయికల వివరాలు వెల్లడించిన ఆయన తాజాగా ఈ చిత్ర దర్శకుడెవరో చెప్పారు. ఎ. గోకుల్‌ కృష్ణ ఈ క్రేజీ ప్రాజెక్టుకు సారథ్యం వహించనున్నారని సోషల్‌ మీడియా వేదికగా తెలిపారు. పలు విజయవంతమైన చిత్రాలకు రచయితగా పనిచేసిన గోకుల్‌ గతంలో నాని హీరోగా ‘ఆహా కల్యాణం’ అనే చిత్రాన్ని తెరకెక్కించారు. ఎం. ఎం. కీరవాణి సంగీత దర్శకుడిగా ఎంపికైన ఈ చిత్రంలో నయనతార చక్రవర్తి, ప్రియాలాల్‌ కథానాయికలు. ఈ చిత్ర కథానాయకుడి వివరాలు తెలియాల్సి ఉంది.