Ghani: ‘గని’ ఓటీటీ రాకకు డేట్‌ ఫిక్స్‌..!

హైదరాబాద్‌: బాక్సింగ్‌ నేపథ్యంలో సాగే కథాంశంతో వరుణ్‌తేజ్‌ నటించిన చిత్రం ‘గని’. కిరణ్‌ కొర్రపాటి దర్శకత్వం వహించిన ఈ సినిమా ఏప్రిల్‌ నెలలో ప్రేక్షకుల ముందుకు వచ్చింది. బాక్సర్‌ కావాలని కలలు కనే ఓ యువకుడు.. కుటుంబం, ప్రత్యర్థుల నుంచి ఎలాంటి ఇబ్బందులు ఎదుర్కొన్నాడు? తల్లికిచ్చిన మాట కోసం అతడు బాక్సింగ్‌కు దూరమవుతాడా? ఇలాంటి ఆసక్తికరమైన అంశాలతో ఈ సినిమా రూపుదిద్దుకున్నప్పటికీ బాక్సాఫీస్‌ వద్ద మిశ్రమ స్పందనలకే పరిమితమైంది. తాజాగా ‘గని’ ఓటీటీ రిలీజ్‌పై అధికారిక ప్రకటన వెలువడింది. ‘ఆహా’ ప్లాట్‌ఫామ్ వేదికగా ఈ నెల 22న ‘గని’ని ప్రేక్షకుల ముందుకు తీసుకురానున్నట్లు చిత్రబృందం ప్రకటించింది. ఇక, ఈ సినిమా విషయానికి వస్తే వరుణ్‌తేజ్‌కు జోడీగా నటి సయీ మంజ్రేకర్‌ నటించారు. నదియా, ఉపేంద్ర, జగపతిబాబు, సునీల్‌ శెట్టి కీలకపాత్రలు పోషించారు. అల్లు బాబీ ఈ చిత్రానికి నిర్మాతగా వ్యవహరించారు.