Samantha: త్వరలోనే బాలీవుడ్‌ చిత్రం!

సమంత (Samantha)... హాలీవుడ్‌, బాలీవుడ్‌, టాలీవుడ్‌.. ఇలా అన్ని పరిశ్రమల్లో అవకాశాలు అందిపుచ్చుకొంటోంది. ఇప్పటికే ‘ఫ్యామిలీ మెన్‌ 2’తో(The Family Man2) హిందీ ప్రేక్షకులను ఆకట్టుకున్న సామ్‌.. ఓ హాలీవుడ్‌ ప్రాజెక్టుకు పచ్చజెండా ఊపిన సంగతి తెలిసిందే. తొలిసారి ఆమె ఏ బాలీవుడ్‌ చిత్రంలో మెరవనుంది? అని ఆమె అభిమానుల్లో ఆసక్తి ఉంది. త్వరలోనే దానికి సమాధానం రానుంది. వరుస హిట్లతో బాలీవుడ్‌లో తనకుంటూ మంచి గుర్తింపు తెచ్చుకున్న నటుడు ఆయుష్మాన్‌ ఖురానాతో(Ayushmann Khurrana) కలసి ఆమె తెర పంచుకోనుందని తెలుస్తోంది. ఇప్పటికే బాలీవుడ్‌ (Bollywood) ఎంట్రీ కోసం ఆమె అనేక కథలు విన్నారు. వాటిల్లో ఇంకా దేన్ని ఓకే చేయలేదు. ప్రస్తుతం ఓ స్క్రిప్ట్‌ ఆమెకు నచ్చిందని బాలీవుడ్‌ వర్గాలు చెబుతున్నాయి. అందులోని హ్యూమర్‌, కామెడీ, సస్పెన్స్‌ అంశాలు సామ్‌ను మెప్పించాయట. అందుకే ఈ ప్రాజెక్టు ఓకే చేసిందని వార్తలు వస్తున్నాయి. ఇందులో ఆయుష్మాన్‌ ఖురానా కథానాయకుడని తెలుస్తోంది. దినేష్‌ విజన్‌ అనే నిర్మాణ సంస్థ ఈ ప్రాజెక్టు చేపట్టనుంది. దీనికి సంబంధించి మరిన్ని   వివరాలు త్వరలోనే అధికారికంగా వెలువడనున్నాయి. సమంత వరుణ్‌ ధావన్‌తో కలసి చేస్తున్న హిందీ వెబ్‌సిరీస్‌ త్వరలోనే   ప్రేక్షకుల ముందుకు రావడానికి ఏర్పాట్లు జరుగుతున్నాయి. తెలుగులో ఆమె ‘యశోద’, ‘శాకుంతలం’ సినిమాల్లో నటిస్తోంది.