Gurthundha Seethakalam: ఈ సినిమా అందరి హృదయాలు గెలుచుకుంటుంది..: సత్యదేవ్‌

హైదరాబాద్‌: సత్యదేవ్‌ హీరోగా తెరకెక్కుతున్న సినిమా ‘గుర్తుందా శీతాకాలం’. ఈ సినిమా డిసెంబర్‌ 9న ప్రేక్షకుల ముందుకు రానుంది. ఈ సందర్భంగా ఏర్పాటు చేసిన మీడియా సమావేశంలో నటుడు సత్యదేవ్‌ మాట్లాడుతూ.. ‘తమన్నా సినిమాను అంగీకరించడం చాలా సంతోషంగా అనిపించింది. మూడు లవ్‌స్టోరీలు కలిసిన మంచి ప్రేమకథా చిత్రమే ఈ ‘గుర్తుందా శీతాకాలం’ అని అన్నారు. ‘‘నేను కామెడీ, ప్రేమ కథా చిత్రాలు చేస్తున్నా.. పెద్ద క్యారెక్టర్‌లు వస్తున్నాయేంటి అనుకునేవాడిని. అప్పుడు నాకు నాగ్‌శేఖర్‌ ఈ కథ చెప్పారు. 10 నిమిషాలకే ఓకే చేశాను. హీరోయిన్‌ గురించి ఆలోచిస్తుంటే తమన్నా అంగీకరించినట్లు చెప్పారు. ఈ సినిమాలో తమన్నా చేసిన  పాత్ర ఎప్పుడూ చేయలేదు. ‘సుహాసిని’ పాట యూత్‌ను ఆకట్టుకుంది. నాగ్‌శేఖర్‌ ఈ సినిమా తర్వాత టాప్‌ దర్శకుల్లో ఒకరుగా ఉంటారు. ఈ చిత్రం కచ్చితంగా అందరి హృదయాలను గెలుచుకుంటుంది. కమర్షియల్‌గా పెద్ద విజయం సాధిస్తుందని నేను నమ్ముతున్నా’’ అన్నారు.

ఇక దర్శకుడు మాట్లాడుతూ ఈ సినిమా టైటిల్‌ అందరూ కలిసి ఒకేసారి సెలెక్ట్‌ చేశారన్నారు. ఈ ప్రేమకథ అందరి హృదయాలకు హత్తుకుంటుందని తెలిపారు. ఇప్పటికే అన్ని పనులు పూర్తిచేసుకున్న ఈ సినిమాకు కాలభైరవ ట్యూన్స్‌ అందించారు. ఇందులో మేఘా ఆకాష్‌, కావ్య శెట్టి కీలక పాత్రలు పోషిస్తున్నారు. భావన రవి, రామారావు చింతపల్లి, నాగ్‌శేఖర్‌ సంయుక్తంగా నిర్మిస్తున్నారు.