Harish Shankar: వెబ్‌సిరీస్‌తో అలరించనున్న హరీశ్‌ శంకర్‌

హైదరాబాద్‌: ‘గబ్బర్‌సింగ్‌’, ‘గద్దలకొండ గణేశ్‌’ వంటి కమర్షియల్‌ చిత్రాలతో సినీప్రియుల్ని అలరించిన ప్రముఖ దర్శకుడు హరీశ్‌ శంకర్‌. ప్రస్తుతం ఆయన ఓ ఆసక్తికరమైన వెబ్‌సిరీస్‌తో ప్రేక్షకుల్ని ఆకట్టుకునేందుకు సిద్ధమయ్యారు. భారీ దొంగతనం నేపథ్యంలో సాగే కథతో ఆయన ఓటీటీలోకి అడుగుపెడుతున్నారు. ఈ మేరకు ప్రముఖ ఓటీటీ ప్లాట్‌ఫామ్ జీ5 కోసం హరీశ్‌ శంకర్‌ ఓ కథ సిద్ధం చేశారు. సి.చంద్రమోహన్‌ దీనికి దర్శకత్వం వహించనున్నారు. ‘ఏటీఎం’ పేరుతో ఈ సిరీస్‌ త్వరలో ప్రేక్షకుల ముందుకు రానుంది. ఈ విషయాన్ని తెలియజేస్తూ గురువారం ఉదయం ‘ఏటీఎం’ టైటిల్‌ పోస్టర్‌ని హరీశ్‌ శంకర్‌ నెటిజన్లతో పంచుకున్నారు. దిల్‌రాజు ప్రొడెక్షన్స్‌ పతాకంపై హర్షిత్‌ రెడ్డి, హన్షితారెడ్డి, హరీశ్‌ శంకర్‌ సంయుక్తంగా దీనిని నిర్మిస్తున్నారు.