Adipurush Trailer: ప్రభాస్‌ ‘ఆది పురుష్‌’ ట్రైలర్‌ వచ్చేస్తోంది!

హైదరాబాద్‌: ప్రభాస్‌ (Prabhas) రాముడిగా ఓం రౌత్‌ దర్శకత్వంలో తెరకెక్కుతున్న ఇతిహాసగాథ ‘ఆది పురుష్‌’ (Adipurush). కృతిసనన్‌ సీతగా నటిస్తోంది. ఇప్పటికే చిత్రీకరణ పూర్తి చేసుకున్న ఈ సినిమా ప్రస్తుతం నిర్మాణానంతర కార్యక్రమాలు జరుపుకొంటోంది. టీజర్‌తో తీవ్ర విమర్శలు ఎదుర్కొన్న చిత్ర బృందం ఇప్పుడు వాటిని సరిచేసే పనిలో ఉంది. వీఎఫ్‌ఎక్స్‌ను మరింత నాణ్యతతో ప్రేక్షకులను మంత్రముగ్ధులను చేసేలా విజువల్స్‌ను తీర్చిదిద్దుతున్నారు. ఈ నేపథ్యంలో అందరినీ అలరించేలా ‘ఆది పురుష్‌’ ట్రైలర్‌ను తీసుకొచ్చేందుకు సన్నాహాలు చేస్తున్నారు.

సినీ వర్గాల సమాచారం ప్రకారం మే 9న తెలుగు, తమిళ, కన్నడ, హిందీ, మలయాళ భాషల్లో ట్రైలర్‌ను విడుదల చేసేందుకు ఏర్పాటు చేస్తున్నారు. తెలుగు రాష్ట్రాల్లోని వివిధ థియేటర్స్‌లోనూ ప్రత్యేకంగా ప్రదర్శించనున్నారు. ట్రైలర్‌ ప్రదర్శించే థియేటర్స్‌ జాబితాను సమయాన్ని ప్రభాస్‌ అభిమానులు సామాజిక మాధ్యమాల వేదికగా పంచుకుంటున్నారు. 3డీలోనూ ‘ఆది పురుష్‌’ ట్రైలర్‌ ప్రదర్శిస్తారట. మరోవైపు జూన్‌ 16న ప్రపంచవ్యాప్తంగా సినిమాను విడుదల చేసేందుకు సిద్ధమవుతున్న నేపథ్యంలో తిరుపతి వేదికగా ప్రీరిలీజ్‌ వేడుక నిర్వహించనున్నారట. దీనిపై చిత్ర బృందం అధికారికంగా స్పందించాల్సి ఉంది. భూషణ్‌కుమార్‌, కృష్ణకుమార్‌, ఓంరౌత్‌ నిర్మిస్తున్న ఈ సినిమాలో సైఫ్‌ అలీ ఖాన్‌ లంకేష్‌ పాత్రలో నటిస్తున్నారు. లక్ష్మణుడిగా సన్నీ సింగ్‌, హనుమాన్‌ పాత్రలో దేవదత్త నాగే తదితరులు అలరించనున్నారు.