Avatar2: ‘అవతార్‌2’.. బెంగళూరులో ఒక్కో టికెట్‌ రూ.1400.. హైదరాబాద్‌లో ఎంతో తెలుసా?

హైదరాబాద్‌: యావత్‌ సినీ ప్రపంచం ఎంతో ఆసక్తిగా ఎదురు చూస్తున్న హాలీవుడ్‌ చిత్రం ‘అవతార్‌2’. జేమ్స్‌ కామెరూన్‌ దర్శకత్వంలో రూపొందిన ఈ సినిమాను ‘అవతార్‌: ది వే ఆఫ్‌ వాటర్‌’ (Avatar: The Way of Water)పేరుతో ప్రపంచవ్యాప్తంగా డిసెంబరు 16న విడుదల చేయనున్నారు. ఇప్పటికే విడుదల చేసిన టీజర్‌ అంచనాలను పెంచుతుండగా, ఈ రోజు ట్రైలర్‌ వాటిని రెట్టింపు చేసింది. మొదటి భాగాన్ని మించి విజువల్‌ వండర్‌గా సీక్వెల్‌ను తీర్చిదిద్దినట్లు ప్రచార చిత్రాలను చూస్తే అర్థమవుతోంది.

ప్రస్తుతం ఈ సినిమా టికెట్‌ బుక్సింగ్స్‌ దేశవ్యాప్తంగా ప్రారంభమయ్యాయి. ‘అవతార్2’ను ఇంగ్లీష్‌తో సహా, ఏడు భాషల్లో విడుదల చేస్తుండటం విశేషం. ఇటీవల కాలంలో ఒక హాలీవుడ్‌ సినిమాను ఇంత భారీ స్థాయిలో రిలీజ్‌ చేయడం ఇదేనేమో. ప్రముఖ టికెట్‌ బుకింగ్‌ సైట్స్‌, యాప్‌లు ప్రధాన నగరాల్లోని థియేటర్స్‌లో బుకింగ్స్‌ను అందుబాటులోకి తెచ్చాయి. ‘అవతార్‌2’ (Avatar: The Way of Water)ను ఐమ్యాక్స్‌ 3డీ, 4డీఎక్స్‌ 3డీ ఫార్మాట్‌లలోనూ విడుదల చేస్తుండటంతో ఆ స్క్రీన్‌లపైనే చూసేందుకు ప్రేక్షకులు ఆసక్తి చూపుతున్నారు. ఈ ఫార్మాట్‌ కలిగిన స్క్రీన్‌ల టికెట్‌ ధరలు చూస్తే గుండెలు గుభేల్‌ మంటున్నాయి. ఓ ప్రముఖ టికెట్‌ బుకింగ్‌ సైట్‌ బెంగళూరులోని ఐమ్యాక్స్‌ 3డీ ఫార్మాట్‌ కలిగిన థియేటర్‌లో టికెట్‌ ధర ఏకంగా రూ.1,450 చూపిస్తోంది. అలాగే పుణెలో రూ.1200 (4డీఎక్స్‌ 3డీ), దిల్లీ-ఎన్‌సీఆర్‌లో రూ.1000గా ఉంది. ముంబయిలో రూ.970, కోల్‌కతా రూ.770, అహ్మదాబాద్‌ రూ.750, ఇండోర్‌ రూ.700 ఉండగా, హైదరాబాద్‌లో ఒక్కో టికెట్‌ ధర రూ.350 (4డీఎక్స్‌ 3డీ ఫార్మాట్‌) విశాఖ రూ.210* (3డీ ఫార్మాట్‌) ఉంది. ఈ ధరలన్నీ సాధారణ సీట్స్‌కు సంబంధించినవి. వీటికి పన్నులు, ఇంటర్నెట్‌ ఛార్జీలు అదనం. ఇక రెక్లైనర్‌ సీటింగ్‌ ధరల వివరాలు తెలియాల్సి ఉంది. త్వరలోనే సాధారణ థియేటర్స్‌లోనూ టికెట్‌లు అందుబాటులో ఉంచనున్నారు. (పై ధరలు సీటింగ్‌ను బట్టి కొన్ని థియేటర్‌లో స్వల్ప మార్పులు ఉండవచ్చు).

‘అవతార్‌2’ (Avatar: The Way of Water) లో సామ్‌ వర్దింగ్టన్‌, జోయా సాల్దానా, సిగుర్నే వీవర్‌, కేట్‌ విన్స్‌లెట్‌ తదితరులు కీలక పాత్రలు పోషిస్తున్నారు. ‘పాండోర’ గ్రహంలోని విలువైన లోహాలను దోచుకెళ్లేందుకు వచ్చిన మానవులను నావీ తెగ ఎలా అడ్డుకుంది? ఒక మనిషిగా ఆ గ్రహానికి వచ్చిన హీరో ‘అవతార్‌’ (జేక్‌ సులే)గా మారి వాళ్ల పక్షానే నిలబడి ఎలా పోరాటం చేశాడు? ఈ క్రమంలో నావీ తెగ కోల్పోయింది ఏంటి? తదితర అంశాలతో కామెరూన్‌ మొదటి భాగాన్ని తీర్చిదిద్దారు. స్వస్థలాన్ని కోల్పోయిన నావీ ఎటు పయనించింది. సముద్రంతో అనుబంధం ఎలా ఏర్పడింది? అక్కడ వారికి ఎదురైన పరిస్థితులు ఏంటి? తదితర విషయాలను ‘అవతార్‌2’లో చూపించనున్నారు. ఈ సినిమా హిట్టయితే, ‘అవతార్‌3’, ‘అవతార్‌4’ చిత్రాలను తెరకెక్కిస్తామని జేమ్స్‌ కామెరూన్‌ తెలిపారు. అయితే, మిగిలిన రెండు చిత్రాలకు తాను దర్శకత్వం వహించకపోవచ్చని ఇటీవల ఓ ఇంటర్వ్యూలో వెల్లడించారు.