Hungama 2: ఓటీటీలో మరో బాలీవుడ్‌ చిత్రం

ముంబయి: కరోనా రెండో దశ ప్రభావంతో చిత్రసీమ నష్టాల్లో కూరుపోయింది. థియేటర్లు మూతపడటంతో సినిమాలు పూర్తయినా విడుదల చేసే అవకాశం లేదు. చాలా సినిమాలు ఓటీటీ బాట పడుతున్నా కొన్ని మాత్రం ఇప్పటివరకూ ఎదురుచూశాయి. కానీ పరిస్థితులు చక్కబడటానికి మరింత సమయం పట్టేలా ఉండటంతో ఆ చిత్రాలు కూడా ఓటీటీలో విడుదలకే మొగ్గు చూపుతున్నాయి. తాజాగా ‘హంగామా 2’ కూడా ఓటీటీలో విడుదల కానుంది. త్వరలోనే డిస్నీ+హాట్‌స్టార్‌లో స్ట్రీమింగ్‌ కానుంది.

విజయవంతమైన బాలీవుడ్‌ చిత్రం ‘హంగామా’కు సీక్వెల్‌గా తెరకెక్కిన చిత్రమిది. పరేశ్‌ రావల్, శిల్పాశెట్టి, మీజన్‌ జాఫ్రీ, ప్రణీత ప్రధాన పాత్రల్లో నటించారు. ప్రియదర్శన్‌ తెరకెక్కించిన ఈ చిత్రం పూర్తిస్థాయి వినోదాత్మకంగా సాగనుంది. చిత్ర నిర్మాతలు రతన్‌ జైన్, చేతన్‌ జైన్, గణేష్‌ జైన్‌ ప్రముఖ ఓటీటీతో సంప్రదింపులు పూర్తి చేసినట్టు సమాచారం. త్వరలోనే అధికారిక ప్రకటన వెలువడే అవకాశముంది.