Kangana Ranaut: కంగనతో నా కుమారుడి ప్రేమను వ్యతిరేకించలేదు: హీరో తండ్రి

ముంబయి: బాలీవుడ్‌ నటి కంగనా రనౌత్‌ (Kangana Ranaut), నటుడు అధ్యాయన్‌ సుమన్‌ (Adhyayan Suman) ఎన్నో ఏళ్ల క్రితం రిలేషన్‌లో ఉన్న విషయం తెలిసిందే. 2008లో తెరకెక్కిన ‘రాజ్‌’ సినిమాతో మొదలైన వీరి ప్రేమకథ అనుకోని కారణాలతో కొన్నినెలల్లోనే ముగింపు కార్డు పడింది. ఈ క్రమంలోనే వీరి బ్రేకప్‌ గురించి తాజాగా అధ్యాయన్‌ తండ్రి శేఖర్‌ స్పందించారు. తన కుమారుడి ప్రేమకు తాను వ్యతిరేకిని కాదని చెప్పారు.

‘‘కంగన - అధ్యాయన్‌ ప్రేమకథ గురించి నాకు పూర్తిగా తెలుసు. వాళ్ల మధ్య ఏం జరిగిందో కూడా తెలుసు. కానీ, నేను కంగనతో ఎప్పుడూ మాట్లాడలేదు. ఎందుకంటే, ఇది అధ్యాయన్‌ సమస్య. అతడే ఫైట్‌ చేయాలి. నేను కేవలం అతడికి ధైర్యం మాత్రమే ఇవ్వగలను. వాళ్ల ప్రేమకు నేను వ్యతిరేకిని కాదు. కంగన -  అధ్యాయన్‌ విడిపోతే చూడాలని ఎంతో మంది అనుకున్నారు. రిలేషన్‌షిప్‌ సక్సెస్‌ కాకపోవడానికి వాళ్లిద్దరి తప్పు లేదు కానీ పరిస్థితుల ప్రభావంతోనే వాళ్లు విడిపోయారు’’ అని శేఖర్‌ వివరించారు.

ఇక, కంగన - అధ్యాయన్‌ రిలేషన్‌ గురించి అప్పట్లో ఎన్నో వార్తలు చక్కర్లు కొట్టాయి. ఈ క్రమంలోనే శేఖర్‌ సైతం కంగనను తిడుతూ సోషల్‌మీడియాలో పోస్టులు పెట్టాడు. అలాగే పలు ఇంటర్వ్యూల్లోనూ తీవ్ర విమర్శలు చేశారు. దీంతో వీరి ప్రేమాయణం అప్పట్లో బీటౌన్‌లో చర్చనీయాంశంగా మారింది.