NBK 107: బాలయ్య సినిమాలో ఇండో ఆస్ట్రేలియన్‌ భామ

హైదరాబాద్‌: నందమూరి బాలకృష్ణ - గోపీచంద్‌ మలినేని కాంబినేషన్‌లో ఓ మాస్‌ ఎంటర్‌టైనర్‌ సిద్ధమవుతోన్న సంగతి తెలిసిందే. NBK 107 వర్కింగ్‌ టైటిల్‌తో చిత్రీకరణ జరుపుకుంటోన్న ఈచిత్రానికి సంబంధించి ఓ ఆసక్తికరమైన అప్‌డేట్‌ బయటకు వచ్చింది. ఈ సినిమా కోసం ఇండో ఆస్ట్రేలియన్‌ భామ, ‘చీకటి గదిలో..’ ఫేమ్‌ చంద్రికా రవి రంగంలోకి దిగింది. వాస్తవిక కథాంశాలతో రూపుదిద్దుకుంటోన్న ఈ సినిమాలో స్పెషల్‌ సాంగ్‌ కోసం చిత్రబృందం ఆమెను ఎంపిక చేసింది. మొదట ఈ పాట కోసం డింపుల్‌ హయాతిని ఎంపిక చేసినట్లు వార్తలు వచ్చినప్పటికీ, చంద్రికను ఫైనల్‌ చేసినట్లు తెలుస్తోంది. NBK107లో భాగం కావడం ఎంతో ఆనందంగా ఉందంటూ చంద్రిక తాజాగా ఓ పోస్ట్‌ పెట్టారు. ప్రస్తుతం ఈ పాట చిత్రీకరణ హైదరాబాద్‌ రామోజీ ఫిలింసిటీలో కొరియోగ్రాఫర్‌ శేఖర్‌ మాస్టర్‌ సారథ్యంలో జరుగుతోంది. మరోవైపు సెట్‌లో బాలయ్య, గోపీచంద్‌లతో దిగిన ఫొటోని తమన్‌ షేర్‌ చేశారు. మైత్రి మూవీ మేకర్స్‌ పతాకంపై నిర్మితమవుతోన్న ఈసినిమాలో శ్రుతిహాసన్‌ కథానాయికగా నటిస్తున్నారు.