‘లగాన్‌’ను నిర్మించలేమని చేతులెత్తేస్తే..!

భారతీయుల ఆత్మగౌరవానికి, బ్రిటిష్‌ దొరల అహంకారానికి మధ్య జరిగిన కథగా ఆద్యంతం హృదయాల్ని తాకేలా తెరకెక్కిన చిత్రం ‘లగాన్‌’ (Lagaan). మూడేళ్ల పాటు పన్నుల నుంచి మినహాయింపు పొందడానికి మనదేశంలోని ఓ ప్రాంతానికి చెందిన కొందరు ఓ టీమ్‌గా ఏర్పడి తెల్లవాళ్లతో క్రికెట్‌ ఆడి గెలిచిన తీరుకి ప్రేక్షకుల నీరాజనం పట్టారు. బాక్సాఫీసు వద్ద వసూళ్ల వర్షం కురిపించిన ఈ సినిమాని నిర్మించడానికి మొదట్లో ఎవరూ ముందుకు రాలేదంటే ఆశ్చర్యం వేయక మానదు. చిత్ర దర్శకుడు అశుతోష్‌ గోవారికర్‌ ఈ సినిమా కథని పలువురు నిర్మాతలకు వినిపిస్తే చాలా బాగుంది కానీ నిర్మించలేము అని చేతులెత్తేశారట. కథని గోవారికర్‌ ఎంత బలంగా నమ్మారో...ఆమిర్‌ (Aamir Khan) కూడా అంతే విశ్వసించారు. దాంతో ఆయనే తన ‘ఆమిర్‌ఖాన్‌ ప్రొడక్షన్స్‌’లో తొలి చిత్రంగా దీన్ని నిర్మించారు. ఈ సినిమా కోసం గోవారికర్‌ పడిన కష్టం అంతా ఇంతా కాదు. ఆయన ఓ రోజు షూటింగులో గాయాల పాలై మంచం మీద నుంచి లేవలేని పరిస్థితి ఏర్పడింది. అయినాసరే సినిమా ఆగకూడదని గోవారికర్‌ తన మానిటర్‌ పక్కనే ప్రత్యేకంగా ఓ బెడ్‌ను ఏర్పాటు చేయించుకొని చిత్రీకరణను కొనసాగించడం ఆయన నిబద్ధతకు నిదర్శనం. అప్పటి వరకూ ఏ భారతీయ చిత్రానికి పనిచేయనంత ఎక్కువమంది బ్రిటిష్‌ నటులు ఈ సినిమా కోసం పనిచేయడం మరో విశేషం.