Sarkaru Vaari Paata: ‘సర్కారువారి పాట’ ఈ ఆసక్తికర విషయాలు మీకోసం..

ఇంటర్నెట్‌డెస్క్‌: ‘ఆర్‌ఆర్‌ఆర్’, ‘కేజీయఫ్‌2’,‘ఆచార్య’ తర్వాత మరో పెద్ద చిత్రం తెలుగు బాక్సాఫీస్‌ వద్ద సందడి చేసేందుకు సిద్ధమైంది. మహేశ్‌బాబు(Mahesh babu) కథానాయకుడిగా పరశురామ్‌ దర్శకత్వంలో తెరకెక్కిన చిత్రం ‘సర్కారువారిపాట’(Sarkaru Vaari Paata). కీర్తి సురేశ్‌ కథానాయిక. అన్ని కార్యక్రమాలు పూర్తి చేసుకున్న ఈ సినిమా మే 12న ప్రేక్షకుల ముందుకు రానుంది. ఈ సందర్భంగా ఈ మూవీ గురించి ఆసక్తికర విశేషాలు మీకోసం...

* మహేశ్‌బాబు వెండితెరపై కనిపించి రెండున్నరేళ్లు దాటిపోయింది. 2020 సంక్రాంతి సందర్భంగా ‘సరిలేరు నీకెవ్వరు’ చిత్రంతో ఆయన ప్రేక్షకులను అలరించారు. ఆ తర్వాత కరోనా ఎఫెక్ట్‌తో ‘సర్కారువారి పాట’(Sarkaru Vaari Paata) ఆలస్యమవుతూ వచ్చింది.

* 2020 మే 31న కృష్ణ పుట్టినరోజు సందర్భంగా ‘సర్కారువారి పాట’ చిత్రాన్ని అధికారికంగా ప్రకటించారు.

* మహేశ్‌బాబు-పరశురామ్‌ కాంబినేషన్‌లో వస్తున్న తొలి చిత్రం ఇది.

* తొలుత ఈ సినిమాలో కథానాయికగా కియారా అడ్వాణీ, సయీ మంజ్రేకర్‌ల పేర్లు వినిపించాయి. కానీ, చివరకు కీర్తిసురేశ్‌ను ఓకే చేశారు. మహేశ్‌తో కీర్తికి ఇది తొలి చిత్రం.

* ఇక ప్రతినాయకుడి పాత్ర కోసం ఎవరిని తీసుకోవాలా? అన్నదానిపై చిత్ర బృందం తీవ్రంగా చర్చించింది. ఒకానొక సందర్భంగా కన్నడ నటుడు ఉపేంద్ర పేరు కూడా వినిపించింది. కానీ, రెండు షెడ్యూల్స్‌ పూర్తయిన తర్వాత సముద్రఖని ఓకే అయ్యారు.

* తమన్‌-మహేశ్‌బాబు కాంబినేషన్‌లో వస్తున్న నాలుగో చిత్రం ‘సర్కారువారి పాట’(Sarkaru Vaari Paata). గతంలో ‘దూకుడు’, బిజినెస్‌మెన్‌,  ‘ఆగడు’ చిత్రాలకు పనిచేశారు. ఇక పరశురామ్‌తో కలిసి ‘ఆంజనేయుడు’, శ్రీరస్తు-శుభమస్తు చిత్రాలకు తమన్‌ స్వరాలు సమకూర్చారు.

* కరోనా కారణంగా ‘సర్కారువారి పాట’ చిత్ర బృందం తీవ్ర ఇబ్బందులు ఎదుర్కొంది. ఆ తర్వాత మహేశ్‌బాబు మోకాలికి శస్త్ర చికిత్స జరగడంతో కొన్నాళ్లు షూటింగ్‌ వాయిదా పడింది. అంతా బాగుందనే సమయానికి మహేశ్‌ కరోనా బారిన పడ్డారు. ఇలా ఎన్నో అడ్డంకులు ఈ చిత్రానికి ఎదురయ్యాయి.

* తొలుత ఈ సినిమా సంక్రాంతి కానుకగా జనవరి 13, 2022న విడుదల చేయాలని నిర్ణయించారు. షూటింగ్‌ ఆలస్యమవడంతో ఏప్రిల్‌ 1న 2022న విడుదల చేస్తామన్నారు. చివరకు మే 12న ‘సర్కారువారి పాట’ ప్రేక్షకుల ముందుకు వస్తోంది.

* మహేశ్‌బాబు తనయ సితార ఇందులో ఓ పాటకు డ్యాన్స్‌ చేయడం సినిమాకు ప్రధాన ఆకర్షణగా నిలవనుంది.

* కీర్తిసురేశ్‌ కీలక పాత్రల్లో ఈ ఏడాది ఇప్పటికే రెండు సినిమాలు విడుదలయ్యాయి. ‘సర్కారువారి పాట’ మూడో చిత్రం.

* మహేశ్‌ కెరీర్‌లో మొత్తం నాలుగు చిత్రాలు మే నెలలో విడుదలయ్యాయి. నిజం, నాని, బ్రహ్మోత్సం, మహర్షి. ఇప్పుడు ఈ సినిమాలో ఐదోది.

* గతంలో మహేశ్‌ నటించిన ఐదు సినిమాలు గురువారం (బాబీ, సైనికుడు, అతిథి, ఖలేజా, మహర్షి) విడుదల కాగా, ఇప్పుడు ఈసినిమా ఆరోది.