Pawan Kalyan: చిరు సినిమా ఫంక్షన్‌కు గెస్ట్‌గా పవన్‌‌..?

హైదరాబాద్‌: మెగా బ్రదర్స్‌ చిరంజీవి (Chiranjeevi), పవన్‌కల్యాణ్‌ (PawanKalyan) ఒకే స్టేజ్‌పై సందడి చేయనున్నారా? అంటే.. అవుననే అంటున్నాయి టాలీవుడ్‌ వర్గాలు. దీంతో మెగా అభిమానులందరూ త్వరలో జరగనున్న ఆ ఈవెంట్‌ గురించే మాట్లాడుకుంటున్నారు.

మెగాస్టార్‌ చిరంజీవి ప్రధాన పాత్రలో నటిస్తోన్న చిత్రం ‘గాడ్‌ ఫాదర్‌’ (God Father). మలయాళంలో సూపర్‌హిట్‌ అందుకొన్న ‘లూసిఫర్‌’కు రీమేక్‌గా ఇది రానుంది. మోహన్‌రాజా దర్శకుడు. రాజకీయ కథాంశంతో సిద్ధమవుతున్న ఈ సినిమా దసరా కానుకగా అక్టోబర్‌ 5న ప్రేక్షకుల ముందుకు రానుంది. ఈ నేపథ్యంలోనే ‘గాడ్‌ఫాదర్‌’ ప్రీ రిలీజ్‌ ఈవెంట్‌కు చిత్రబృందం భారీగానే సన్నాహాలు చేస్తోంది. ఇందులో భాగంగా పవన్‌కల్యాణ్‌ను ముఖ్య అతిథిగా ఆహ్వానించేందుకు నిర్ణయించుకుందట. పవన్‌ కూడా సుముఖత వ్యక్తం చేశారని నెట్టింట వార్తలు చక్కర్లు కొడుతున్నాయి. వీటిని చూసిన మెగా అభిమానులు ఆనందం వ్యక్తం చేస్తున్నారు. దీంతో త్వరలో జరగనున్న ‘గాడ్‌ఫాదర్‌’ ప్రీ రిలీజ్‌ ఈవెంట్‌ ఇప్పుడు అంతటా చర్చనీయాంశంగా మారింది.