Rashmika: ‘యానిమల్‌’ కోసం రష్మిక?

హిందీలో వరుసగా అవకాశాలు అందుకొంటోంది రష్మిక మందన్న. ఆమె నటించిన హిందీ సినిమాలు విడుదల కాక ముందే ‘పుష్ప’తో ఆమె పాన్‌ ఇండియా హీరోయిన్‌గా పేరు తెచ్చుకుంది. ఇప్పుడు ఉత్తరాది నుంచి దక్షిణాది వరకు శ్రీవల్లిగా ప్రేక్షకులకు సుపరిచితమైంది. దాంతో మరిన్ని హిందీ చిత్రాలు ఆమె తలుపు తడుతున్నాయి. రణబీర్‌ కపూర్‌ కథానాయకుడిగా పాన్‌ ఇండియా చిత్రంగా తెరకెక్కనున్న ‘యానిమల్‌’ కోసం రష్మికని సంప్రదించినట్టు తెలిసింది. తెలుగు దర్శకుడు సందీప్‌రెడ్డి వంగా తెరకెక్కించనున్న చిత్రమిది. ఇందులో  ఓ ప్రత్యేక గీతంలో ఆడిపాడేందుకు రష్మిక మందన్నని సంప్రదించినట్టు తెలిసింది. మరి ఆమె నిర్ణయం ఏమిటనేది బయటికి రాలేదు. హిందీలో  ఎన్ని అవకాశాలు వచ్చినా దక్షిణాది పరిశ్రమని వదలకుండా సినిమాలు చేస్తోంది రష్మిక. ఇటీవలే ఆమె ‘ఆడవాళ్ళు మీకు జోహార్లు’ సినిమాలో నటించింది.