Suriya: రెండు భాగాలుగా కంగువ

కథానాయకుడు సూర్య (Suriya), దర్శకుడు శివ కలయికలో ‘కంగువ’ (Kanguva) పేరుతో ఓ బహుభాషా చిత్రం రూపొందుతోన్న సంగతి తెలిసిందే. యూవీ క్రియేషన్స్‌, స్టూడియో గ్రీన్‌ సంస్థలు సంయుక్తంగా నిర్మిస్తున్నాయి. దిశా పటాని కథానాయిక. భారీ పీరియాడిక్‌ యాక్షన్‌ డ్రామాగా ముస్తాబవుతున్న ఈ సినిమాలో సూర్య అత్యంత పరాక్రమవంతుడిగా కనిపించనున్నారు. అయితే ఇప్పుడీ చిత్రానికి కొనసాగింపుగా మరో భాగం రానున్నట్లు తెలిసింది. ఈ విషయాన్ని చిత్ర సన్నిహిత వర్గాల్లో ఒకరైన నిర్మాత ధనంజయన్‌ ధ్రువీకరించారు. ఇటీవల ఓ ఇంటర్వ్యూలో దీనిపై స్పష్టత ఇచ్చారు. ఈ చిత్ర కథ చాలా పెద్దదని, అందుకే దీన్ని రెండు భాగాలుగా చెప్పాలన ఆలోచనకు వచ్చారని, తొలి భాగం క్లైమాక్స్‌ రెండో భాగానికి చక్కటి ఆరంభమవుతుందని ఆయన చెప్పారు. ఈ సినిమా ప్రస్తుతం కొడైకెనాల్‌లో శరవేగంగా చిత్రీకరణ జరుపుకుంటోంది. సూర్యతో పాటు దిశా పటానిపై కీలక సన్నివేశాల్ని తెరకెక్కిస్తున్నారు. ఈ చిత్రాన్ని త్రీడీలో 10కి పైగా భాషల్లో విడుదల చేసేందుకు సన్నాహాలు చేస్తున్నారు. ఇది 2024 ప్రారంభంలో థియేటర్లలోకి వచ్చే అవకాశముంది. ఈ సినిమాకి సంగీతం: దేవిశ్రీ ప్రసాద్‌, ఛాయాగ్రహణం: వెట్రి పళనిసామి.