Istandwithsonusood: ‘రియల్‌ హీరో’ నివాసంపై ఐటీ దాడులా?

దిల్లీ: కరోనా లాక్‌డౌన్‌ సమయంలో ఎంతో మందికి సాయం చేసి సోనూసూద్‌ ‘రియల్‌ హీరో’ అనిపించుకున్నారు. అయితే, నిన్న ఆయన నివాసంలో ఐటీ విభాగం సోదాలు నిర్వహించిన విషయం తెలిసిందే. ఆదాయ వివరాల్లో అవకతవకలు ఉన్నాయన్న ఆరోపణల నేపథ్యంలో ఆదాయపు పన్ను అధికారులు సోదాలు నిర్వహిస్తున్నారు. ఈ సోదాలు రెండో రోజు కూడా కొనసాగుతున్నాయి. అయితే, ఈ ఐటీ దాడులపై సోనూ అభిమానులు నిరసన వ్యక్తం చేస్తున్నారు. సోషల్‌ మీడియాలో #Istandwithsonusood అనే ట్యాగ్‌తో నెటిజన్లు ఆయనకు మద్దతుగా నిలుస్తున్నారు. ఇది ప్రస్తుతం నెట్టింట్లో వైరల్‌గా మారింది.

సోనూసూద్‌కు సంబంధించి ముంబయి, లఖ్‌నవూలోని ఆరు ప్రాంతాల్లో రెండో రోజు సోదాలు జరుగుతుండగా అభిమానులు తమ రియల్‌ హీరోను సపోర్టు చేయడం గమనార్హం. కరోనా విజృంభణలో సమయంలో వేలాది మంది వలస కార్మికులకు సహాయం చేసినందుకు సోనూ చాలా మంది నుంచి ప్రశంసలు అందుకున్నారు. కరోనా రెండో వేవ్‌లోనూ పలు సహాయక చర్యలను చేపట్టి వేలాది మంది ప్రేమాభిమానాలను చూరగొన్నారు. ఈ ఐటీ దాడులను ఖండిస్తూ నెటిజన్లు ఆయనకు తమ మద్దతును తెలుపుతున్నారు. ఈ దాడులను ప్రతిపక్షాలు సైతం తీవ్రంగా ఖండిస్తున్నాయి.