Punch Prasad: పంచ్‌ ప్రసాద్‌కు తీవ్ర అనారోగ్యం.. సాయం కోరుతూ వీడియో

హైదరాబాద్‌: జబర్దస్త్‌ నటుడు పంచ్‌ ప్రసాద్‌ (Punch Prasad) కిడ్నీ సమస్యతో ఇబ్బందిపడుతోన్న విషయం తెలిసిందే. తాజాగా ఆయన ఆరోగ్యం మరింత క్షీణించిందని మరో జబర్దస్త్‌ కమెడియన్‌ నూకరాజు తెలిపారు. కిడ్నీ ట్రాన్స్‌ప్లాంటేషన్‌ చేయించాల్సిందేనని వైద్యులు తెలిపారని, సాయం చేయమంటూ నూకరాజు ఓ వీడియో షేర్‌ చేశారు. ‘‘గడిచిన మూడేళ్ల క్రితం ప్రసాద్‌ రెండు కిడ్నీలు పాడైపోయాయి. ఆనాటి నుంచి డయాలసిస్‌, ఇతర చికిత్సలు తీసుకుంటున్నారు. ఈ క్రమంలోనే పలు అనారోగ్య సమస్యలకు గురయ్యారు. అయితే ఇప్పుడు ఆయన ఆరోగ్యం మరింత క్షీణించింది. తప్పనిసరిగా కిడ్నీ ట్రాన్స్‌ప్లాంటేషన్‌ చేయించాల్సిందేనని వైద్యులు సూచించారు. కిడ్నీ ట్రాన్స్‌ప్లాంటేషన్‌ అనేది లక్షలతో కూడుకున్న వ్యవహారం. దయచేసి మాకు సాయం చేయండి’’ అంటూ నూకరాజు పేర్కొన్నారు.