Akhanda: ఉర్రూతలూగించిన ‘జై బాలయ్య’.. ఫుల్‌ వీడియో వచ్చేసింది!

ఇంటర్నెట్‌ డెస్క్‌: గతేడాది విడుదలై సంగీత ప్రియుల్ని ఉర్రూతలూగించిన గీతాల్లో ‘జై బాలయ్య’ ఒకటి. ‘అఖండ’ సినిమాలోని ఈ పాట విడుదలైన తక్కువ కాలంలోనే యూట్యూబ్‌లో అత్యధిక వీక్షణలు సొంతం చేసుకుంది. బాలకృష్ణ హుషారైన స్టెప్పులు, తమన్‌ సంగీతం ఓ రేంజ్‌లో ఆకట్టుకున్నాయి. ఎప్పుడెప్పుడు ఫుల్‌ వీడియో వస్తుందా? అని ఆసక్తిగా ఎదురుచూసిన వారికి చిత్ర బృందం ఆ కానుకను అందించింది. బాలకృష్ణ డ్యాన్స్‌ అందరినీ కట్టిపడేసేలా ఉంది. ఆయన సరసన ప్రజ్ఞా జైశ్వాల్‌ పోటీపడి నర్తించింది. అనంత శ్రీరామ్‌ రచించిన ఈ పాటను గీతా మాధురి, సాహితి చాగంటి, సత్య యామిని, అదితి భవరాజు ఆలపించారు.

బోయపాటి శ్రీను తెరకెక్కించిన ఈ సినిమాలో బాలకృష్ణ ద్విపాత్రాభినయం చేశారు. జగపతి బాబు, శ్రీకాంత్‌, పూర్ణ తదితరులు కీలక పాత్రలు పోషించారు. మిర్యాల రవీందర్‌రెడ్డి నిర్మించిన ఈ సినిమా 2021 డిసెంబరులో విడుదలై ఘన విజయం అందుకుంది. అమెరికా నుంచి ఆంధ్రా వరకూ వసూళ్ల వర్షం కురిపించింది. ప్రముఖ ఓటీటీ డిస్నీ+ హాట్‌స్టార్‌లో జనవరి 21 నుంచి స్ట్రీమింగ్‌ కానుంది.