Jawan: ‘జవాన్‌’ విడుదల తేదీ ఖరారు

అగ్ర కథానాయకుడు షారుక్‌ ఖాన్‌ హీరోగా అట్లీ తెరకెక్కిస్తున్న చిత్రం ‘జవాన్‌’. అనేకసార్లు వాయిదా పడుతూ వస్తున్న ఈ సినిమా విడుదల తేదీని ఎట్టకేలకు ఖరారు చేశారు. సెప్టెంబరు 7న ఈ చిత్రం విడుదల కానుందంటూ షారుక్‌ శనివారం సామాజిక మాధ్యమాల్లో పంచుకున్నారు. ఈ సందర్భంగా టీజర్‌తోపాటు, ఓ ప్రచార చిత్రాన్ని ఆయన విడుదల చేశారు. నయనతార, విజయ్‌సేతుపతి, సన్యా మల్హోత్రా, ప్రియమణి కీలక పాత్రలు పోషిస్తున్నారు. ఇందులో దీపికా పదుకొణె అతిథి పాత్రలో కనిపించనుంది.

కొత్త కొత్తగా...

ప్రముఖ నటుడు థర్టీ ఇయర్స్‌ పృథ్వీ దర్శకుడిగా మారారు. తన కుమార్తె శ్రీలుని కథానాయికగా పరిచయం చేస్తూ ‘కొత్త రంగుల ప్రపంచం’ అనే సినిమాని తెరకెక్కించారు. క్రాంతి కథానాయకుడు. పద్మరేఖ, గుంటక శ్రీనివాస్‌రెడ్డి, కె.కృష్ణారెడ్డి కలిసి నిర్మిస్తున్నారు. విడుదలకి సిద్ధమైన ఈ సినిమా టీజర్‌ని ప్రముఖ నటుడు నాగబాబు విడుదల చేశారు. కార్యక్రమంలో సుమన్‌, నాయకానాయికలతోపాటు, ఇతర చిత్రబృందం పాల్గొంది.